Ministru Administrasaun Estatál, Miguel Pereira Carvalho. Imajen TATOLI/Antonio Goncalves.

DILI, 13 juñu 2022 (TATOLI)—Ministru Administrasaun Estatál (MAE), Miguel Pereira de Carvalho, hateten atu kria suku foun presiza estuda no halo análiza hafoin foti desizaun.

Nia hatutan, hosi parte Governu liu-liu Ministériu Administrasaun Estatál (MAE) simu ona pedidu hosi komunidade iha sentru Waiaka, munisípiu Baucau nian atu sai suku foun no karta haruka ona ba MAE no halo hela estudu ida kona-ba situasaun terrenu.

“Sei presiza halo estudu iha tempu tuir mai bainhira konklui mak Ministériu Administrasaun Estatál bele foti desizaun. Ohin, ha’u rai hela mensajen rua ba ita-nia komunidade iha área sentru ida-ne’e, liu-liu iha sentru Waiaka katak kolabora ho téknika sira hosi MAE atu kompleta informasaun, tékniku sira-ne’e tanba importante tebes,” Governante ne’e hateten liuhosi komunikadu imprensa ne’ebé Agência TATOLI asesu, segunda ne’e.

Governante ne’e salienta tan katak desizaun polítika ne’ebé foti tenke bazea ba informasaun tékniku sira-nian.

“Ha’u mós apela ba populasaun sira-ne’ebé hela iha área ida-ne’e para promove diskusaun la’ós entre sira ho sira maibé sira ho vizinu sira. Bainhira ita forma suku ida, iha nia impaktu ba mudansa estrutura suku ne’e, bolu naran suku prinsipál ho suku foun no mós impaktu territóriu ho suku vizinu sira. Promove diskusaun sira hanesan ne’e, nune’e aban bainrua Governu foti desizaun karik a-favór atu nune’e labele kria problema iha populasaun sira-nia leet,” nia hateten.

Governante ne’e kontinua enkoraja no husu atu kria nafatin relasaun di’ak ho vizinu sira, tanba bainhira hanoin atu kria suku foun ne’e presiza tebes inklui suku viziñu.

Tuir lei Nú. 9/2016, 8 Jullu, kona-ba Lei suku ne’ebé aprova iha loron 24 maiu 2016, iha artigu 3 (Definisaun husi Suku) iha alinea 1 hateten suku hanesan pesoa koletiva hosi direitu públiku ho natureza asosiativa ne’ebé harii bazea ba sirkunstánsia istórika, kulturál no tradisionál sira no sira-nia membru iha ligasaun liuhosi relasaun família ka hosi lasu tradisionál sira, iha fatin ne’ebé define.

Iha alinea 2 haktuir, suku sira-ne’ebé eziste iha sidade hanesan pesoa koletiva hosi direitu públiku ho natureza asosiativa ne’ebé harii bazea ba prosesu sosiál no istóriku ne’ebé hetan marka hosi migrasaun hosi etnia oioin, iha tempu kolonizasaun nia laran, ne’ebé mai hosi natureza familiár hosi lasu ne’ebé uluk iha, iha fatin ne’ebé define.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here