Ekipa téknika aeroportu transporta mate-isin João Assunção Lucas entrega ba família, iha Aeroportu Comoro, segunda (13/06). Imajen/SEFOPE

DILI, 13 juñu 2022 (TATOLI)—Mate-isin traballadór timor-oan, João Assunção Lucas, segunda ne’e, to’o iha Aeroportu Internasionál Prezidente Nicolau Lobato, Comoro hosi Koreia Súl.

Mate-isin simu diretamente hosi Xefe Gabinete Sekretaria Estadu Formasaun Profisionál no Empregu (SEFOPE), João das Neves inklui Diretór Nasionál Empregu Exteriór, Filomeno Soares, hodi entrega kedan ba família hodi lori ba postu administrativu Letefoho, munisípiu Ermera.

Biban ne’e, Diretór Nasionál Empregu Exteriór hato’o sentimentu triste tanba prepara ona joven sira hodi haruka serbisu iha ema-nia rain hodi hadi’a ekonomia família no nasaun nian, maibé ikus mai lakon vida.

“Governu halo esforsu fasilita timor-oan sira serbisu iha rai-li’ur atu hadi’a moris, maibé buat ne’ebé akontese ba matebian João ida-ne’e planu Maromak nian,” Diretór hateten hafoin simu mate-isin, iha Aeroportu Comoro.

Notísia relevante: Traballadór timor-oan ida hakotu-iis iha Koreia Súl

Nune’e, Dirijente ne’e reprezenta Governu no funsionáriu SEFOPE tomak, hato’o sentidu kondolénsia profunda ba família matebian no enkoraja nafatin inan-aman no maun-alin matebian atu iha forsa nafatin hodi hasoru situasaun difísil.

Biban ne’e, nia parte agradese mós ba Embaixadór Timor-Leste ha Koreia Súl, diplomata sira hotu inklui adidu traballu ne’ebé trata dokumentu to’o ohin loron mate-isin bele to’o mai Timór.

Matebian João Assunção hanesan traballadór timor-oan ida ne’ebé serbisu iha Koreia Súl hahú iha loron 05 juñu 2021, iha área fábrika maibé nia halo serbisu durante fulan-ida de’it sofre moras TBC iha kakutak no pulmaun, ikus mai baixa iha ospitál Nam Young Geriatric to’o iha loron 29 maiu 2022 hakotu nia pregrinasaun iha mundu.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here