Logotipu EDTL. Imajen/Espesiál

VIQUEQUE, 13 juñu 2022 (TATOLI)–Servisu Eletricidade de Timor Leste, Empreza Públika (EDTL, E.P) munisípiu Viqueque sei kontinua halo koordenasaun ho autoridade sira hodi monta filafali kontadór pre-pagu iha postu administrativu Uatulari.

Tuir Diretór EDTL.EP Viqueque, Ernesto Sarmento, antes ne’e ekipa téknika monta ona iha suku Macadique, maibé mosu intervensaun hosi komunidade, entaun ekipa retira hosi postu Uatulari.

“Tanba ne’e, agora ha’u halo hela negosiasaun ho administradór munisípiu no administradór postu hodi prosesu instalasaun ne’e la’o filafali. Ho ida-ne’e, ha’u kuaze loron-loron mai hasoru administradór munisípiu hodi halo konfirmasaun. Iha fulan ida-ne’e tenki hetan solusaun ba kontadór pre-pagu iha postu Uatulari,” Diretór hateten ba Agência Tatoli, iha ninia knaar fatin, segunda ne’e.

Notísia relevante: EDTL, E.P Viqueque konsege monta prepagu 30 iha suku Macadique

Nia dehan, bainhira prosesu negosiasaun maka laiha solusaun, maka posibilidade EDTL, E.P sei tesi liña eletrisidade ba postu Uatulari.

“Iha prosesu negosiasaun maka laiha rezultadu, ami sei hato’o ba mídia no posibilidade tesi liña eletrisidade, maibé ami mós hein despaixu hosi diresaun nível altu EDTL, E.P,” nia akresenta.

Aleinde ne’e, bainhira monta pre-pagu iha postu Uatucarbau mak ramata ona no iha semana ida-ne’e postu Ossu ramata, mak sei kontinua ba postu Uatulari.

“Instalasaun kontadór pre-pagu iha postu Uatucarbau ramata ona ho ninia dadus maka ha’u ladún dekor, maibé tempu ida ha’u sei fó sai ba públiku. Postu Ossu daudaun monta hela iha suku tolu hanesan Uagia, Builale no Ossurua, ho totál pre-pagu 200 resin, maibé kuandu instala hotu ne’e pre-pagu bele to’o 300, enkuantu postu Ossu tomak kontadór hamutuk 500,” nia informa.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here