BAUCAU, 13 juñu 2022 (TATOLI) – Servisu Saúde Munisípiu Baucau segunda ne’e, hala’o avaliasaun kona-ba implementasaun kampaña vasinasaun nune’e identifika problema ne’ebé durante ne’e pesoál saúde sira enfrenta.
Diretór Nasionál Apoiu Servisu Hospitalar, Nilton do Carmo da Silva, informa, problema transporte no meiu atu hetan partisipasaun komunidade iha kampaña vasinasaun mak difikulta implemetasaun kampaña vasinasaim nune’e munisípiu Baucau tipu AstraZeneca atinje 85% no Booster atinje 15%.
Enkuantu atinjimentu vasinasaun Pfizer ba estudante no labarik sira hosi idade 12 to’o 17, hosi doze dahuluk no daruak atinje ona 85%, hosi estudante na’in-21.802 no totál eskola hamutuk 213 kompostu hosi ensinu báziku sestu-anu, ensinu báziku sentrál no sekundária.
“Ida-ne’e mak problema ne’ebé ita observa durante tinan-rua ikus ne’e bainhira ita aplika vasina,” Diretór Nasionál Apoia Servisu Horpitalar iha Ministériu Saúde ne’e hateten iha Vila Antiga.
Nune’e objetivu hosi enkontru avaliasaun refere profisionál saúde no tékniku sira hamutuk ho dirijente buka identifika problema no fó solusaun hanesan halo rekomendasaun ba servisu saúde munisípiu no ministériu saúde iha nasionál nune’e hadi’a hodi atinje tarjetu.
Bazea ba númeru munisípiu Baucau liu ona tarjetu maibé tanba ameasa surtu covid-19 kontinua iha evolusaun nune’e Ministériu Saúde kontinua hasa’e númeru kobertura to’o hetan rekomendasaun hosi Organizasaun Mundál Saúde (OMS) katak pandemia remata ona iha mundu.
“Governu liuhosi Ministériu Saúde oinsá mak atu prevene no kontrola sidadaun sira liuhosi vasina hanesan kontinua hasa’e númeru booster,” Nilton do Carmo akresenta.
Responsável Promosaun Saúde Eskolár Sentru Saúde Quelicai, Salomão Salustiano Gama, hateten, kampaña vasinasaun ba estudante iha postu administrativu Quelicai hamutuk eskola 43 ne’ebé sai alvu hosi suku 15 no aldeia 55.
“Presiza hadi’a liña koordenasaun, liuliu ho profesór no dirijente eskolár sira, bainhira to’o eskola alunu sira preparadu atu vasina,” Salomão Salustiano Gama hateten.
Salomão rekoñese kondisaun iklima difikulta transporte atu asesu ba eskola sira nune’e médiku sira tenke hiit ekipamentu no vasina to’o iha fatin alvu.
Tuir dadus hosi Servisu Saúde Baucau, katak totál ema-ne’ebé partisipa ona vasinasaun tipu AstraZeneca hamutuk na’in-64.478, Pfizer na’in-16.792 hosi tótal alvu 73.317.
Jornalista : Natalino Belo
Editór : Evaristo Soares Martins
