Autoridade lokál partisipa iha reuniaun Konsellu Konsultivu Munisipál Baucau iha CCB, Vila Antiga, segunda (13/06). Imajen Tatoli/Natalino Belo.

BAUCAU, 13 juñu 2022 (TATOLI) – Autoridade Administrasaun Munisipál Baucau segunda ne’e, realiza reuniaun asembleia Konsellu Konsultivu Munisipál, ho objetivu atu rona membru asembela sira-nia hanoin no proposta hodi halo planu asaun anuál ba tinan 2023.

Prezidente Autoridade Munisipál Baucau, Olívio ‘Bou Lesa’ Freitas hateten, liuhosi reuniaun ne’e membru sira sei hato’o paresér no proposta ne’ebé sei liuhosi votu aprovasaun nune’e parte autoridade munisipál sei prepara ba planu asaun anuál.

Prezidente Autoridade Munisípiu Baucau, Olívio ‘Bou Lesa’ Freitas. Imajen Tatoli/Natalino Belo.

“Rezultadu hosi reuniaun ne’e ami sei prepara ba planu asaun anuál tinan-2023 ne’ebé sei realiza iha loron 4 jullu iha munisípiu Laútem ne’ebé sei partisipa hotu hosi munisípiu hotu,” Prezidente Autoridade Munisipál Baucau, hateten iha Sentru Konvensaun Baucau (CCB, sigla portugés), segunda ne’e.

Membru sira iha direitu partisipa no hato’o paresér kona-ba nesesidade bázika hanesan setór edukasaun, saúde, agrikultura, infraestrutura, turizmu no setór sosiál-ekonomia ne’ebé povu sente iha baze.

Autoridade administrasaun munisipál Baucau iha reuniaun refere aprezenta mós taxa ezekusaun  orsamentu tinan-2022 ne’ebé daudaun ne’e atinje ona 41% hosi balansu $2.899.861, gastu obrigasaun no kompromsiu hamutuk $2.031.258,87 hosi tótal orsamentu tinan-2022 hamutuk $4.931.124.

“Ita planu maibé tenke iha akordu liuhosi reuniaun konsellu koordenasaun munisipál,” Bou Lesa akresenta.

Xefi suku Buruma nu’udar mós membru konsellu konstrutivu munisipál, Libório dos Santos Freitas, konsidera reuniaun ne’e importante ne’ebé koalia kona-ba vida munisípiu nian iha tinan-ida laran.

Nia husu atu autoridade Baucau hahú projeta ona investimentu iha setór produtivu hanesan agrikultura no turizmu ne’ebé sei fó rendimentu ekonomia direitamente ba povu iha baze.

“Ami rekomenda atu hahú hanoin ona oinsá dezenvolve setór turizmu no agrikultura iha munisípiu Baucau,” Libório Freitas hateten.

Membru asembleia konsellu konstrutivu munisipál kompostu hosi xefu suku na’in-59, Konsellu Kombatente Libertasaun Nasionál Baucau, konviksaun relijiozu, akadémiku, reprezentante hosi partidu polítiku sira.

Nune’e mós organizasaun juventude, organizasaun promosaun feto, setór privadu hamutuk hotu tótal na’in-79 ne’ebé lidera direitamente hosi Prezidente Autoridade Munisipál, Olívio ‘Bou Lesa’ Freitas nu’udar prezidente asembleia.

Jornalista    : Natalino Belo

Editór          : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here