Uma kazebu Wani-Uma iha Baucau. Imajen/MTKI

DILI, 12 juñu 2022 (TATOLI)–Ministériu Turizmu Komérsiu no Indústria (MTKI), iha sábadu (11/06) ne’e, inaugura uma kazebu ne’ebé harii iha aldeia Wani-Uma, suku Caibada, postu administrativu Baucau vila, munisípiu Baucau.

Fatin ne’e nu’udar uma ba turizta sira bainhira vizita ba Wani-Uma, ne’ebé hetan apoiu hosi konsesionáriu ba MTKI liuhosi Diresaun Jerál Jogu (IGJ, sigla portugés) hodi responde ba polítika Governu ne’ebé hatúr ona katak atividade jogu tenke kontribui hodi dezenvolve ekonomia kiik sira liuhosi hosi apoiu saida de’it.

Ministru Turismu Komérsiu no Indústria, José Lucas do Carmo da Silva, hateten, ho baze iha lei no polítika Governu maka iha tempu hirak liubá hola inisiativa no haree ba nesesidade atu kontribui hodi hadi’a infraestrutura balun, ne’ebé tuir MTKI no IGJ nia avaliasaun sai nu’udar prioridade atu hetan ajuda ruma hodi kontribui ba populasaun sira-nia moris.

“Ha’u husu komunidade hotu atu uza ho didi’ak no kuidadu uma ne’e, tanba infraestrutura ne’ebé Governu no konsesionáriu halo hanesan insentivu ida atu sidadaun sira bele hadi’a sira-nia vida, tanba turizmu nu’udar setór transversál, tanba ne’e presiza parte hotu nia responsabilidade atu kuidadu fatin ne’e,” Ministru hameno iha ámbitu inaugurasaun, ne’ebé ne’ebé Agência Tatoli asesu, domingu ne’e.

Notísia relevante: IGJ hatama reseita jogu legál milliaun $25 ba kofre Estadu

Iha biban hanesan, Inspetór Jogu, Domingos Guterres,  agradese ba konsesionáriu jogu sira-nia kontribuisaun no servisu hamutuk ho MTKI-IGJ, hodi dezenvolve ona fatin turizmu sira no husu komunidade iha área Wani-uma atu kuidadu didi’ak fatin turizmu ne’e atu dada turizta sira atu vizita no hatama rendimentu ba komunidade lokál.

Nune’e mós, Xefe suku Caibada José Soares, husu MTKI ba oin kontinua dezenvolve liután fatin Wani-Uma, nune’e bele dada turista internasionál no lokál sira atu vizita fatin turizmu ne’e.

Infraestrutura ne’e harii ho kustu hamutuk $37.475,52, ne’ebé molok inaugura Ministru José Lucas hamutuk ho Inspetór jogu no diretór sira akompaña misa agradesimentu ba loron aniversáriu IGJ ba dala-XIV.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here