Rezultadu perfurasaun bee-moos hosi empreza HO2 iha aldeia Caisido, suku Tirilolo, postu Baucau vila, munisípiu Baucau. Imajen Tatoli/Natalino Belo

BAUCAU, 12 juñu 2022 (TATOLI)–Autoridade suku husu Bee Timor-Leste, Empreza Públika (BTL, E.P) konsidera pedidu kanalizasaun bee-moos ba komunidade iha aldeia Caisido, suku Tirilolo, postu admistrativu Baucau vila, munisípiu Baucau.

Xefe suku Tirilolo, Ricardo Ernesto Belo. Imajen Tatoli/Natalino Belo

Xefe suku Tirilolo, Ricardo Ernesto Belo, hateten, pedidu ne’ebé hato’o relasiona ho rezultadu perfurasaun bee-moos hosi empreza H20, ne’ebé hetan ajuda finanseira hosi Governu Austrália iha área Caisido, suku Tirilolo.

“Ita husu BTL, E.P atu halo kanalizasaun ba rezultadu perfurasaun bee iha área Caisido, atu nune’e komunidade aldeia haat bele asesu ba bee-moos,” Autoridade suku informa ba Agência Tatoli, iha aldeia Caisido, domingu ne’e.

Notísia relevante: BTL sosializa sitema bee-moos ba autoridade lokál iha Baucau

Autoridade suku hato’o pedidu direitamente ba Prezidente Konsellu Administrasaun BTL, E.P, Carlos Peloi no hetan rekoñesimentu hosi admistradór postu Baucau vila, atu husu kanalizasaun bee-moos ba kada aldeia no futuru tuir kada uma-kain tuir kapasidade fornesimentu.

Perfurasaun bee-moos hosi empreza HO2 iha aldeia Caisido, suku Tirilolo, postu Baucau vila, munisípiu Baucau. Imajen Tatoli/Natalino Belo

Nune’e, autoridade suku husu empreza estatál atu aselera pedidu ne’ebé hato’o ona tanba durante tinan barak komunidade aldeia haat iha suku Tirilolo enfrenta falta bee-mos, ne’ebé sai nesesidade bazika ba moris loron-loron nian.

“Karik bele prevee orsamentu oituan hodi aselera kanalizasaun bee-mos ba komunidade tanba durante tinan barak enfrenta falta bee-moos,” nia akresenta.

Ba kestaun ne’e, Xefe suku garante komunidade aldeia haat prontu kontribui serbisu ho voluntáriamente bainhira realiza kanalizasaun bee-moos ba komunidade.

Perfurasaun bee-moos iha área Caisido hosi empreza H20 ho kle’an metru 79,4 to’o hetan bee, maibé perfurasaun to’o metru 81 ho kondisaun rai, enkuantu bee nia a’as metru 57,31, ho volume bee fó sai litru lima pur segundu.

Tuir dadus, suku Tirilolo iha aldeia neen hanesan Betulale, Caisido, Lialaiselu, Parlamentu, Ossoua, Lutumutu hosi tótal populasaun 9.789 hosi uma-kain 1.702.

Jornalista : Natalino Belo

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here