Líder Rezisténsia, Kay Rala Xanana Gusmão, ko’a dose iha selebrasaun aniversáriu ba dala-76, iha Sala Leitura Xanana, Bidau Lecidere, sábadu (11/06). Imajen Tatoli/Natalino Costa

DILI, 11 juñu 2022 (TATOLI)—Líder Rezisténsia, Kay Rala Xanana Gusmão, sábadu ne’e, selebra aniversáriu ba dala-76, ne’ebé iha biban ne’e halo leilaun ba nia pintura rasik hodi halo doasaun ba kbiit laek sira, apoiu  finansiamentu ba Sala Leitura Xanana no grupu dansa kulturál Le-Ziaval.

“Pintura ida-ne’e, ha’u rasik maka pinta durante ha’u eskola tinan-hitu  iha prizaun laran,” Xanana Gusmão hateten iha Sala Leitura Xanana, Bidau Lecidere.

Tuir loloos aniversáriu Xanana Gusmão iha loron 20 juñu maibé tanba líder rezisténsia ne’e sei auzente ba rai-li’ur maka deside hodi selebra antes.

Notísia relevante: PM Taur Hato’o Ksolok Aniversáriu Ba Kay Rala Xanana Gusmão

Tuir Líder Karizmátiku ne’e, presiza haforsa Sala Leitura Xanana hodi kontinua sai fatin buka matenek ba estudante sira hodi kapasita-an, liuhosi hatoman-an lee hodi sai matenek, nune’e bele kontribui ba prosesu dezenvolvimentu nasaun, nune’e mós grupu dansa kulturál Le-Ziaval hodi bele fó oportunidade ba timor-oan hodi hatudu talentu liuhosi dansa kulturál sira. 

Iha Biban hanesan, Emprezáriu nasionál, Fernando da Silva, ne’ebé hanesan mós na’in ba Devita Group, konsege hola Xanana Gusmão nia pintura ne’ebé pinta iha prizaun laran, bainhira sai hanesan prizioneiru polítiku iha Cipinang, Indonézia.

Pintura ne’ebé aprezenta iha biban ne’e iha tolu, ne’ebé Xanana rasik la define presu maibé emprezáriu nasionál no internasionál inklui konvidadu balun ne’ebé partisipa iha serimónia aniversáriu, hatudu vontade hakarak hola nia pintura hosi presu $8.000  to’o  $10.000.

Aleinde ne’e, Xanana mós halo leilaun ba nia puizia sira ne’ebé nia hakerek iha kadeia laran ho títulu ‘liberdade’, ne’ebé emprezáriu balun hola ho presu $16.000 no puizia ho títulu ‘o meu mar’, emprezáriu balun hola ho folin $ 10.000.

Nune’e mós, halo leilaun ba nia livru ne’ebé nia hakerek rasik ho títulu ‘A temátika de gerra’, inklui livru tolu seluk ne’ebé nia rasik  halo leilaun ho  presu $2.000.

“Hola livru sira ne’e para  imi no imi-nia oan sira bele hatene prosesu istória luta Timor-Leste nian,” Xanana fó hanoin.

Iha biban ne’e, Xanana Gusmão kongratula Sala Leitura Xanana, ne’ebé kompleta ona tinan-20 ezisténsia.  

Ho nune’e, Líder Karizmátiku ne’e husu atu Sala Leitura kontinua sai fatin referénsia no fatin apreende ba estudante timor-oan, nune’e estudante sira bele dezenvolve-an di’ak liután.  

Iha sorin seluk, Fundadora Sala Leitura Xanana, Kirsty Sword Gusmão, parabeniza Xanana ne’ebé halo tinan ba ohin loron.

“Ha’u hanesan Fundadora Sala Leitura, hakarak fó parabéns ba Maun Xanana ne’ebé ohin halo tinan,” nia dehan.

Entretantu, selebrasaun aniversáriu Xanana ne’e hetan partisipasaun mós hosi Prezidente Repúblika, José Ramos Horta. 

Bainhira Xanana ko’a dose aniversáriu, ba dahuluk nia hakat hodi fó han ba Ramos Horta, hafoin partisipante sira seluk.

Serimónia ne’e partisipa hosi korpu diplomátiku, empreza nasionál no internasionál sira inklui  kuadru partidu CNRT nian.

Jornalista : Natalino Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here