Prezidente Republika Ramos Horta akompaina husi eis jogador nasional Franca, Cristian Carimbeu hit Tasa Copa Mundial iha Palacio Prezidensial Aitarak Laran, sabadu 11 juinu 2023.Imajen Tatoli Antonio Daciparu

DILI, 11 juñu 2022 (TATOLI) – Prezidente Repúblika, José Manuel Ramos Horta, konsidera vizita Troféu Mundiál iha loron-ábadu ne’e, hahú koloka Timor-Leste iha mapeamentu futeból mundiál.

Troféu Mundiál konsege to’o iha Timor – Leste iha tuku 09:30 no vizita Palásiu Prezidensiál Bairru-Pité no hakat liu ba Estádiu Munisipál Dili. Iha-ne’ebé troféu ne’e rai iha Dili durante oras hitu.

Prezidente Republika Ramos Horta akompana husi eis jogador Nasional Franca Cristian Carimbeu iha Palacio Prezidensial Aitarak Laran, sabadu 11 juinu 2023.Imajen Tatoli Antonio Daciparu

Troféu ne’e mai ho aviaun privadu hosi kompañia Cocacola ne’ebé akompaña direta hosi Cocacola no futebolista lejendáriu hosi nasaun França Christian Karembeu.

To’o iha aeroportu internasionál Prezidente Nicolau Lobato, simu direita hosi Prezidente Federasaun Futeból Timor – Leste (FFTL), Francisco Martins Pereira Jerónimo, Sekretáriu Estadu Juventude no Desportu (SEJD) lori kedas ba Palásiu Preziediál no simu direita hosi Prezidente Repúblika, José Manuel Ramos Horta.

Prezidente Repúblika, José Ramos Horta, hateten, loron ohin ne’e importante tebes ba Timor – Leste tanba hetan vizita hosi troféu mundiál.

“Loron ohin di’ak tebes ba Timor – Leste, la’ós ba de’it futeból maibé ba povu Timor – Leste tomak, tau Timor-Leste dala ida tán iha mapa liuhosi diplomásia futeból nian, desportu bele lori pás no dame ba ema hotu,” Xefe estadu ko’alia hafoin kaer tiha troféu mundiál ne’e.

Ho nune’e nia fó parabéns ba Federasaun Futeból Timor – Leste (FFTL) ne’ebé halo diplomasia di’ak tebes iha futeból ohin loron troféu mundiál ne’e bele to’o mai Timor – Leste atu ema hotu iha nasaun ne’e bele haree rasik ho matan.

Prezidente Republika Ramos Horta akompaina husi eis jogador nasional Franca, Cristian Carimbeu loke Tasa Copa Mundial bainhira too iha Palacio Prezidensial Aitarak Laran, sabadu 11 juinu 2023.Imajen Tatoli Antonio Daciparu

“Nasaun lima-nulu mak husu atu troféu ne’e ba vizita maibé FIFA hili liu Timor – Leste atu mai vizita, parabéns ba FFTL tanba halo diplomasia ida-ne’ebé di’ak tebes,” nia dehan.

Troféu ne’e importante tebes bainhira vizita nasaun ida só Prezidente Repúblika de’it mak bele kaer no ema hotu só bele hasai de’it fotografia.

Futebolista franseza ne’ebé mak lori ekipa nasional França susesu sai kampeaun iha Kopa Mundiál 1998, Christian Karembeu haktuir, vizita trofeu Kopa Mundiál mai Timor-Leste ne’e tanba inisiativa hosi autoridade FFTL, ne’ebé mak la’ós de’it atu fó haksolok ba bola-mania sira hotu iha Timor-Leste, maibé ho vizita trofeu ne’e mos atu inspira Timor-oan sira.

“Ami kuda ona fini balun iha rai Timor-Leste, no espera katak iha tempu tuir mai fini ne’e bele buras no fó fuan. Ida-ne’e sei lori ita ba dalan di’ak,” Karembeu hateten iha Palásiu prezidensiál.

Nia haktuir, vizita mai Timor-Leste nu’udar privileju ida ba nia, ho nunee nia  agradese ba Timor-Leste tanba simu nia ho di’ak.

“Ida-nee hanesan vizita primeiru no ita espera katak iha tempu mai ami sei mai vizita Timor-Leste,” nia dehan. 

Nia hatutan, ema iha hakarak joga bola iha Timor-Leste, ho nunee nia dehan presiza mós fasilidade adekuada hodi dezenvolve futeból Timor-Leste sai di’akliu.

Prezidente Republika Ramos Horta akompana husi eis jogador Nasional Franca Cristian Carimbeu iha Palacio Prezidensial Aitarak Laran, sabadu 11 juinu 2023.Imajen Tatoli Antonio Daciparu

Iha sorin seluk, Prezidente FFTL Francisco Jerónimo relata, esforsu FFTL, Governu no parte hotu nian mak ohin loron troféu ne’e vizita Timor-Leste.

Nia dehan, troféu ne’e mai atu motiva ema hotu atu oinsá Timor – Leste bele haka’as-aan maka’as ba futuru dezenvolve futeból ida-ne’ebé sai ema hotu nia mehi.

Bainhira troféu ne’e to’o iha Estádiu Munidipál Dili ema hotu kontente hakilar iha tribun leten hodi simu troféu ne’e.

Iha Estádiu ne’e Christian akompaña hosi Prezidente Horta hiit troféu ne’e la’o haleu estádiu laran hodi hatudu ba ema hirak-ne’ebé ba asiste direita.

Bainhira remata, Christian tama kedas ba kampu laran hodi demostra ho jogadór sentru juvenil feto na’in-10 no mane na’in-10 hodi tiru bola ba mai iha kampu laran durante menutu 30.

Hafoin vizita iha Timor – Leste, troféu ne’e sei haksumik an hosi Timor – Leste iha tuku 15:00 hodi ba fali nasan sira iha área pasífiku nian Illa Salomão.

Nasaun ne’ebé mak sai kampiaun ba troféu ne’e iha tinan lima ba kotuk mak Fransa. Enkuantu kopa mundiál iha tinan ne’e sei kompete hosi nasaun 40-resin hosi rejiaun Amérika, Ázia, Afrika no Europa.

Troféu mundiál ne’e halo hosi osan-mean ho todan kilograma 6,142, naruk sentímetru 36,8. Troféu ne’e hanesan prémiu ne’ebé aas-liu iha mundu futeból.

Trofóu ne’e halo primeiru iha tinan 1930, iha tempu prezidente FIFA, Jules Rimet hodi halo prémiu ida ba eventu futeból nian. Enkuantu nasaun ne’ebé manán daluluk iha tinan 1930, hosi Urugai iha kontinente Amérika Latina.  Enkuantu Brazil mak nasaun ne’ebé sai kampiaun barak-liu ba troféu mundiál ne’e.

Jornalista   : Hortencio Sanchez

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here