Komisária Nasionál Komisaun Direitu Labarik, Dinorah Granadeiro. Imajen/TATOLI

DILI, 11 juñu 2022 (TATOLI) – Institutu Defeza ba Diretu Labarik (INDDICA, sigla portugués), simu keixa sanulu kona-ba violénsia hasoru labarik iha eskola.

Prezidente INDDICA, Diniorah Granadeiro, fó-sai katak, keixa 10 kona-ba violénsia hasoru labarik ne’e komete hosi manorin-na’in sira iha eskola.

“Iha tinan ne’e, parte INDDICA mós simu keixa hamutuk 10 liga ba kazu violénsia hasoru labarik sira husi manorin-na’in iha eskola iha Timor-Leste,” Prezidente INDDICA, informa Agência TATOLI, iha nia kn’aar salaun City 8, Has laran, Dili.

Nia dehan, kazu violénsia hasoru labarik sira-ne’e hosi eskola sira iha Dili no barak liu iha munisípiu sira.

Tanba tuir dadus ne’ebé INDDICA serbisu hamutuk ho UNICEF no halo análize no hatudu katak, labarik sira hetan violénsia iha eskola hosi manorin na’in sira, katak, labarik mane 75% no labarik feto 65%, ne’ebé deklara katak sira hetan esperiénsia violénsia fízika hosi sira-nia manorin iha eskola. 

Tanba manorin-na’in sira mós baku ho liman ka objetu sira seluk, basa, tebe, kuu ka dudu hosi manorin sira, violénsia emosionál hosi manorin sira prevante liu violénsia fízika inklui insultu pesoál.

“INDDICA nia serbisu hetan keixa lubuk ida, liga ho violénsia hasoru labarik sira iha eskola, tanba ne’e mekanismu ne’ebé mak ami hetan keixa sira-ne’e, ami halo kedas relatóriu no paresér ba iha MEJD atu bele halo invetigasaun ba kazu refere,” Dinorah hateten.

Ho nune’e, nia dehan, iha eskola lubuk ida iha Dili laran, maioria implementa hela polítika ho naran zero toleránsia.

“Ho violénsia hasoru labarik sira-ne’e ita halo esforsu hela atu nune’e nafatin fo hanoin ba MEJD atu iha regulamentu ka regra ruma ne’ebé mak forte no sansaun ne’ebé mak forte ba manorin-na’in sira atu labale kontinua uza violénsia iha prosesu aprendizajen,” nia dehan.

Nia informa, ho regulamentu ka sansaun ba manorin sira durante ne’e, INDDICA haree barak mak lakon sira-nia serbisu nu’udar manorin- na’in no balun muda fatin hanorin nian.

Aselera projetu lei protesaun labarik

Prezidente INDDICA, Diniorah Granadeiro, hateten, lei protesaun ba labarik no joven iha perigu ne’ebé pendente mak fó impaktu ba labarik sira-nia direitu.

“Ministeriu relevante sira tenke fasilita aprovasaun lei pendente sira, to’o ohin loron mak iha impaktu ba labarik Timoroan sira-nia moris,” Nia hateten.

Tanba tuir nia, asaun xave nesesária ida mak ministériu sira presiza monitoriza no aloka orsamentu ba labarik sira-nia nesesidade.

“Nune’e husu responsabilizasaun governu nian ba kompromisu sira mak sira halo hodi realiza labarik sira-nia direitu no ministériu haat sira ne’ebé mak sai  xave ba prosesu ne’e hotu, hanesan Ministériu Saúde, Ministériu Edukasaun, Juventude no Desportu, Ministériu Justisa no Ministériu Solidariedade Sosiál no Inkluzaun mak tenke tau osan no planu hodi bele solusiona problema labarik nian,” nia katak

Nia haktuir, lei protesaun labarik no foinsa’e iha 
Perigu, pendente hahú 2017, lei justisa juvenil, pendente hahú 2010, no Kódigu das Crianças, pendente hahú 2010.

Jornalista : Osória Marques
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here