Eis Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 10 juñu 2022 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, husu ona ba Deputadu, Arão Noe, atu kolabora hodi ba hatán iha Ministéiru Públiku (MP), ligadu ho kazu abuzu podér ne’ebé deskonfia nia-parte komete bainhira asume knar hanesan PPN iha tinan hirak liubá.

Notísia Relevante: Deputadu Arão Noe prontu kolabora hatán Ministériu Públiku

“Ha’u konvida ona Deputadu Arão hodi esklarese situasaun refere maibé ha’u husu ona hanesan sidadaun no ema polítiku atu kolabora mezmu imunidade la hasai maibé ba hatán rasik. Ne’ebé, nia aseita hodi hein notifikasaun,” Prezidente PN ne’e hateten ba Agência Tatoli iha entrevista eskluzivu iha nia knar fatin PN, kuarta (08/06) ne’e.

Aniceto Guterres hateten, iha fulan-janeiru ka fevereiru ne’e nia-parte simu karta notifikasaun ida ba Deputadu Arão Noe atu ba hatán iha MP, nune’e halo kedas despaixu husu atu kolabora maibé hafoin ne’e iha fali karta ida mai tan hosi Prokuradór Jerál Repúblika (PJR) husu fali levantamentu imunidade.

Nune’e, PPN rasik husu paresér ba asesór sira hodi haruka ba komisaun A ne’ebé trata asuntu Justisa no Konstituisionál atu hato’o paresér bele ka lae foti imunidade.

Tanba, tuir nia, kazu foun ida durante ne’e PN foti levantamentu imunidade bainhira prosesu to’o iha Tribunál iha ona akuzasaun atu hala’o julgamentu Tribunál marka ona mak juis husu imunidade, agora ida-ne’e sei iha faze inkeritu PJR husu levantamentu, entaun ida-ne’e buat ida la normál.

“Maibé paresér komisaun A nian hato’o katak la’o tuir hanesan baibain la presiza hasai levantamentu imunidade só hala’o iha ona julgamentu,” nia dehan.

Nune’e Prezidente PN sei haruka karta ida ba PJR atu esplika situasaun refere katak PN deside la foti imunidade no konvida fali Deputadu, Arão Noe, hodi halo inkeritu.

Tan ne’e, nia hateten, prosesu hotu la’o hela no hein membru PN hosi bankada CNRT ne’e sei kolabora ho justisa.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here