Autoridade RAEOA no PNDS inaugura projetu UKL unidade ida iha suku Cunha. Imajen mídia ZEEMS.

OÉ-CUSSE, 10 maiu 2022 (TATOLI) – Programa Nasionál Dezenvolvimentu Suku (PNDS), iha Rejiaun Administrativa Espesiál Oé-Cusse Ambeno (RAEOA), entrega ona konstrusaun projetu Uma Kbiit Laek (UKL) faze dahuluk iha suku 13 hamutuk uma 26 iha rejiaun ne’e.

“Implementasaun projetu UKL faze primeiru iha 2021, Oé-Cusse hetan unidade 36 ba aldeia 18 iha suku 18, to’o ohin ita entrega ona unidade 26 iha suku 13, hela de’it unidade 10 iha suku lima, tanba progresu serbisu sei kompleta ba 100%,” Diretór PNDS Oé-Cusse, Sebastião Tanesi, ko’alia iha Oé-Cusse, sesta ne’e.

Nia informa, suku 13 ne’ebé konklui no entrega ba benefisiáriu sira, hanesan iha sub-rejiaun Oésilo, suku Bobometo, Usitasa’e, no Usitaqueno, iha sub-rejiaun Pássabe mak suku Abani, hela suku Malelat.

Nune’e mós iha sub-rejiaun Nítibe, iha suku Bene-Ufe, Usitaku, Ban-Afi, no Suni-Ufe, hela de’it suku Lela-Ufe. Iha sub-rejiaun Pante Makasar, iha suku Costa, Cunha, Lalisuk, Naimeko no Lifau, hela de’it suku tolu maka seidauk entrega, hanesan suku Nípani, Bobokase no Taiboko.

“Unidade 10 iha suku lima ne’e, ita sei entrega iha juñu ne’e nia laran, tanba progresu atinje ona 95%, serbisu fíziku kuaze hotu ona, hela serbisu ki’ik ona balun presiza kompleta, sira atraza tanba impaktu udan kondisaun estrada atu mobiliza materíal susar tebes, tán ne’e mak atraza uitoan,” nia katak.

Nia fundamenta, bainhira entrega hotu UKL faze dahuluk, parte PNDS sei kontinua prosesa-tán UKL faze daruak nian, ne’ebé daudaun ne’e submete ona ba nasionál hamutuk unidade 168.

Iha RAEOA medida konstrusaun UKL la hanesan, balun 48 m2, balun 37 m2, no totál orsamentu ne’ebé Governo Sentrál liuhosi Ministériu Administrasaun Estatál (MAE) aloka ba UKL unidade 36 iha Oé-Cusse hamutuk $611,296.00.

Entretantu, iha tinan fiskál 2021 Governu harii Uma Kbiit Laek hamutuk unidade-1.254 iha suku 424 iha teritóriu nasionál ho montante orsamentu hamutuk $25,000.000 ho kustu kada uma purvolta $14,000 to’o $17,000.

Nune’e projetu Uma Kbiit Laek, ne’ebé konstrui komposta hosi modelu rua, modelu 48 m2, inklui kuartu tolu (3), sala vizita ida (1) no dapúr ida (1), modelu 37 m2 inklui kuartu rua (2), sala vizíta ida (1) no dapur ida (1).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan