DILI, 10 juñu 2022 (TATOLI)—Primeiru-Ministru (PM), Taur Matan Ruak, husu parseiru dezenvolvimentu sira atu disponibiliza aumenta orsamentu hodi dezenvolve projetu sira ne’ebé nesesáriu ba área rurál.
“Ha’u hakarak konvida parseiru dezenvolvimentu sira hotu iha ne’e, atu konsidera hasa’e kontribuisaun signifikante ba mekanizmu ajuda orsamentu, liuhosi kanaliza projetu ne’ebé dalabarak izoladu tanba iha repetisaun,” PM Taur hateten iha ninia diskursu iha Reuniaun Parseiru Dezenvolvimentu Timor-Leste (TLDPM, sigla inglés), iha Ministériu Finansa, Aitarak-laran, sesta ne’e.
Notísia relevante: TLDPM, Governu Hakarak Konsentra Ba Investimentu Projetu Foun
Xefe Governu dehan, país sei inisia kriasaun grupu apoiu orsamentál, ne’ebé sei sai espresaun hodi bele hasa’e konfiansa tanba iha sistema jestaun finansa públika, iha transparánsia, akontabilidade públika no transparénsia iha jestaun sasán públika no prestasaun konta.
“Ha’u husik dezafiu iha tinan ne’e tanba Grande Opsaun Planu sei sai referénsia prinsipál iha programa finanseira no orsamentasaun, ho nune’e iha espasu no oportunidade ba parseiru dezenvolvimentu sira hotu, bele inklina ita-boot sira-nia interese prioridade ne’ebé integra iha opsaun dezenvolvimentu Timor-Leste nian,” nia akresenta.
Iha fatin hanesan, Embaixadór Austrália iha Timor-Leste, William Costello, espresa ho laran kontente ba apoiu Governu Timor-Leste iha área dezenvolvimentu ekonómiku.
“Timor-Leste kria hela jestaun jurídika negósiu ho instituisaun xave sira ba funsionamentu Estadu,” nia tenik.
Jornalista : Arminda Fonseca
Editora : Julia Chatarina
