Prezidente Autoridade Munisípiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO, 10 juñu 2022 (TATOLI) – Prezidente Autoridade Munisípiu (PAM) Bobonaro, Ernesto de Oliveira Barreto, husu abitante iha liña fronteira atu hapara atividade tranzasaun ilegál  ba sasán kontra-bandu hosi Atambua mai territóriu Timor-Leste.

Nia apela tanba durante semana ne’e Timoroan barak halo atividade tranzaksaun ilegál hatama sasán kontra-bandu sira hosi Atambua, munisípiu Belu, Indonezía mai territóriu Timor-Leste ho dalan ilegál.

“Di’akliu evita buat ida ilegál ne’e, sé lae ita soe osan saugati, tuir mai ita-nia polísia sira halo apreensaun hotu tanba lei, entaun tabaku sira-ne’e sunu hotu tanba lei mak haruka ita labele viola,” nia informa ba jornalista sira iha kna’ar-fatin, Maliana, sesta ne’e.

Prezidente Autoridade husu ba abintante sira-ne’ebé durante ne’e halo atividade ilegál iha fronteira iha liña atu pasiensia uitoan, tanba autoridade ho embaixadór indonézia iha Timor-Leste, Octo Dorinus Manik, diskute ona planu reatvia merkadu tradisionál.

Merkadu tradisionál ne’e lokaliza iha fronteira Turiskain, munisípiu Bellu, provínsia Nusa Tenggara Timur (NTT) nune’e iha parte Timor-Leste nia mak Mozon, aldeia Tunubibi, suku Tapo-Memo, postu administrativu Maliana, munisípiu Bobonaro.

Maibé autoridade ne’e dehan, to’o agora seidauk hetan resposta ruma, tanba Embaixadór Indonezía sei aprezenta planu ne’e inklui konstrusaun ponte ligasaun hosi rai rua ne’e ba  iha Konselu Ministru Indonézia nian iha Jakarta atu hetan aprovasaun.

“Agora ne’e di’akliu prepara lai ita-nia modal tau iha banku lai ba, hodi halo negosiu, ami fiar katak sei fó rendimentu di’ak ba negosiante sira hotu hanesan,” nia heteten.

Nia husu Unidade Patrullamentu Fronteira (UPF) no FALINTIL-Forsa Defeza Timor-leste (F-FDTL) atu kontinua aperta seguransa iha liña fronteira.

“Ha’u hanoin ita-nia seguransa durante ne’e esforsu hela, maibé ita halo nusá ba mós ita-nia ema kontinua tama-sai nafatin, tanba ita-nia fronteira luan, ita labele kontrola hotu. Ne’e duni di’akliu sidadaun sira tenke koopera ho polísia, nune’e labele sunu hotu imi-nia sigarru sira-ne’e,” nia fó hanoin.

Durante ne’e fronteira ne’ebé risku liubá no sai dalan alternativu ba atividade ilegál mak iha postu administrativu Maliana, liuliu suku Saburai no suku Tapo-Memo no Tunubibi.

Iha loron-domingu, 22 fulan-maiu liubá membru UPF kompañia Alfa Tunubibi konsege detein sidadaun Timoroan feto ida ho idade 36 iha área ospitál-tuan, suku Holsa, postu administrativu Maliana ne’ebé tenta lori sigarru ‘arow black’ hamutuk karton tolu pakote 240 hosi Atambua, Indonezía mai territóriu Timor-Leste.

Nune’e mós iha loron segunda, 06 juñu dadeersan purvolta tuku 05.00, UPF kompañia Alfa, postu Memo, halo apreensaun ba kilat-manu marka Sharp Tiger lolon 17, manu bankok 12 no ai-kameli ne’ebé ema deskoñesidu hatama ilegál hosi Atambua.

Iha loron hanesan, tuku 23:00 kalan membru UPF kompañia Alfa detein sidadaun Timoroan na’in-rua ho inisiál (ADS) no (BB) iha fronteira, suku Tapo-Memo, postu administrativu Maliana, munisípiu Bobonaro.

Tuir kedas iha loron-tersa madrugada, tuku 12:55 serBisu konjunta komposta hosi UPF, Komandu Operadsaun Espesiál (COE, sigla portugues) no  F-FDTL destakamentu postu Tunubibi, halo apreensaun ba sigarru Surya 12 karton tolu pakote 259 ne’ebé hatama ilegál.

Nune’e mós detein sidadaun Indonézia na’in-haat (joven hotu) ho  inisiál hanesan (MDC) idade 19, (ES) idade 17, (OYTL) idade 24 no (MB) idada 16. Joven  hirak-ne’e orijen hosi Atambua, Haliwen, munisípiu Belu, ne’ebé lori manu-futu hamutuk tolu hakat fronteira rai-maran tuir dalan ilegál ho objetivu atu mai vizita família iha Timor-Leste.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here