Ilustrasaun labele fuma

DILI, 10 juñu 2022 (TATOLI)— Ministra Saúde, Odete Maria Freitas Belo, husu konsénsia sidadaun hotu atu hapara fuma tabaku tanba tabaku fó impaktu ba ema nia saúde no ambiente.

“Tabaku liga ho ambiente tanba la’os fó impaktu negativu ba de’it individu ne’ebé fuma, maibé ba mós ema ne’ebé mak besik fumadór nomós sigarru rohan ne’ebé so’e arbiru sei fó impaktu negativu ba ema seluk nia saúde,” Ministra Saúde Odete hateten liuhosi nota ne’ebé Agência TATOLI asesu,sesta ne’e.

Minsitra Saúde hato’o kesatun ne’e iha ámbitu komemorasaun loron Hapara Tabaku ka loron la fuma tabaku, ne’eb’e kada tinan selebra iha loron 30 maiu, iha salaun Vida Di’ak iha área prizaun Aipelo, munisípiu Liquiça.

 “Tema ne’ebé ita ko’alia kona-ba tabaku maibé ita liga tabaku ne’e ho ita-nia ambiente, susar oituan bainhira ita lakohi atu komprende didi’ak tanba saidá mak ita hakarak liga tabaku ho ambiente, maibé dalaruma ita haree barak liu hakarak atu liga tabaku ho ita-nia saúde, bainhira ita uza tabaku kle’ur, la’ós ba ita ne’ebé mak fuma de’it maibé afeta mós ba ema sira ne’ebé mak la fuma,” Governante ne’e afirma.

Nune’e, Ministra Saúde husu ba pesoál saúde sira atu halo asaun ruma hodi bele aprezenta iha tinan oin bainhira atu komemora tan loron mundiál “La Fuma Tabaku”

“Se tinan oin mai ita selebra tan dala ida, susesu saidá, asaun saidá mak ita halo hahú ohin ba to’o iha loron 31 fulan maiu 2023 ne’e saidá mak ita hakarak atu hetan iha ne’ebá. Bele ka la’e lae, sé loron 31 maiu 2023 ne’e ita bele dehan 50 ka 60% husi taxista sira, mikrolet sira laiha ema ida mak fuma iha laran,” nia afirma.

Nia hatutan: “Ida-ne’e ita bele halo ka lae, nomós Instituisaun Públiku sira ida ne’ebé mak bele koko ona dezeñu hapara fuma iha ita-nia didin lolon sira ou ita bele dehan katak ida-ne’e la’os área atu fuma nian, presiza halo persentazen ida, atu nune’e tinan oin mai ita la’os ko’alia de’it maibé ita bele aprezenta ona rezultadu sira hosi asaun sira ne’ebé mak halo durante tinan ida nia laran.”

Governante ne’e afirma komemorasaun loron mundiál la fuma tabaku ne’e, fó hanoin fila-fali ba ema hotu, atubele muda sira-nia hanoin, sira-nia atitude atubele hapara fuma iha Timor-Leste.

Alfandega sériu kontrola tabaku ilísitu

Iha biban ketak, Diretór Jerál Autoridade Aduaneira (AA) Alfandega , José Antonio Fatima Abilio, hateten Alfandega hahú reativa operasaun konjunta entre insitutisaun relevante sira iha fronteira Terrestre atu kontola sériu ba importasaun tabaku legal no ilegál sira.

“Importasaun ilegál tama ona mai rai laran ne’e Alfandega mós sei hamutuk ho instituisaun relevante sira halo inspensaun iha loja hodi halo apreensaun ba tabaku ilísitu sira hodi halo destroisaun ka sunu,” nia afirma.

Daduaun ne’e, AA-Alfandega selebra ona akordu ho Indonézia atu halo kontrolu ba iha importasaun tabaku ilegál mai Timor-Leste

Notísia relevante:  AIFAESA-PNTL presiza kontrola sériu importasaun tabaku ilísitu iha Timor-Leste

Jornalista : Felicidade Ximenes/Natalino Costa

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here