MF fasilita asisténsia téknika ba liña setoriál RAEOA hodi rekolla reseita aumenta rendimentu ba kofre Estadu. Imajen Tatoli/Abílio Elo Nini.

OÉ-CUSSE, 10 juñu 2022 (TATOLI) – Ministériu Finansa (MF) liuhosi Diresaun Jerál Tezouru, sesta ne’e realiza semináriu hodi hasa’e koñesimentu asisténsia téknika ba liña setoriál sira iha Rejiaun Administrativa Espesiál Oé-Cusse Ambeno (RAEOA), kona-ba atu rekolla reseita hatama ba kofre Estadu.

Diretóra Jerál Ministériu Finansa, Regina de Jesus de Sousa, informa, objetivu prinsipál tezouru mai Oé-Cusse, atu haree lala’ok rekolla reseita iha liña setoriál sira iha RAEOA, tanba atividade ne’e realiza ona iha munisípiu 12 ikusliu iha Oé-Cusse.

Nune’e mós, identifika difikuldade saida maka liña setorál-sira hasoru, iha parte rekolla reseita, no identifika área poténsia, sira-ne’ebé maka bele hetan reseita atu aumenta rendimentu orsamentu Estadu, nune’e bele kria meiu fasil atu haree kritéria no rekizitu sira, oinsá mak atu rekolla reseita.

Nune’e mós oinsá mak Ministériu Finansa fó asisténsia ba liña setoriál inklui preparasaun relatóriu, preparasaun rekonsiliasaun nomoos relatóriu reseita nian.

“Ministériu Finansa nia prezensa iha RAEOA, atu fó asisténsia téknika oinsá ita atu rekolla reseita ba kofre Estadu, naun-fiskál nomoos ninia relatóriu no rekonsiliasaun sira, tanba Timor-Leste dependénsia maka’as iha fundu minarai, entaun área barak mak ita seidauk haree oinsá mak bele ajuda ita iha área finanseiru, atu reforsa orsamentu Jerál Estadu bele halo despeza dezenvolve nasaun,” Regina de Jesus de Sousa, ko’alia iha seminária ne’e iha salaun edukasaun Oé-Cusse.

Nia informa, iha Oé-Cusse área poténsia barak, atu aumenta rendimentu ba kofre Estadu, maibé seidauk dezenvolve didi’ak fatin sira-ne’e, hanesan fatin turizmu-sira, rai no uma Estadu ne’ebé sidadaun balu okupa ho gratuita.

Prezidente Autoridade RAEOA, Arsénio Paixào Bano, orgullu ba Governu Sentrál tanba fasilita liña setorál sira iha O’e-Cusse, kona-ba asisténsia téknika buka osan aumenta rendimentu ba kofre Estadu.

“Ha’u agradese ba Ministériu Finansa atu apoiu RAEOA, hodi levanta asuntu importante sira-ne’e, tanba RAEOA atu mantein nível orsamentu ne’ebé Governu Sentrál prevee osan ho montante boot, ema sei husu RAEO ne’ebé kontribui iha kofre Estadu, tán ne’e orgullu tanba mai fasilita asisténsia téknika ba finansa sira iha diresaun hotu-hotu atu tau konsiderasaun,” nia orgullu.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here