Kampus SentrálUnivesidade Nasionál Timor-Lorosa'e (UNTL). Imajen Tatoli/Francisco Sony

DILI, 10 juñu 2022 (TATOLI)–Ministériu Ensinu Superiór Siénsia no Kultura (MESSK) konsidera fasilidade sala aula iha Universidade Nasionál Timor Lorosa’e (UNTL) sufisiente ba estudante sira atu partisipa iha prosesu ensinu aprendizajen, maibé presiza jestaun di’ak hodi labele difikulta estudante barak hodi la hetan fatin.

Ministru Ensinu Superiór Siénsia no Kultura, Longuinhos dos Santos, hateten, iha tinan 2019 bainhira UNTL simu estudante tinan akadémiku foun hamutuk 9.000 laiha problema no buat hotu la’o di’ak hela, laiha dosente ka estudante ida maka reklama kona-ba fasilidade sala aula la sufisiente, maibé agora iha tinan 2021 simu estudante hamutuk 6.007 simu reklamasaun sala aula la sufisiente.

“Aumenta númeru estudante asesu ba UNTL ne’e bazeia ba fasilidade foun ne’ebé foin harii daudaun ne’e, ne’ebé UNTL iha ona edifísiu andár tolu ho sala aula hamutuk 54, sufisiente atu akumula estudante foun 6.007 iha tinan 2021. Agora kuandu estudante sira hakilar sala la sufisiente ne’e problema iha universidade tanba sira mak laiha jestaun di’ak atu jere fasilidade sira ne’e atu estudante sira hotu bele hetan direitu asesu ba sala aula sira,” Ministru relata iha Ministériu Finansa, Aitarak-laran, sesta ne’e.

Notísia relevante: Reitór UNTL agradese ba asaun pasífika estudante hodi hadi’a jestaun

Tuir governante ne’e, bainhira parte universidade halo esforsu akumula estudante iha sala aula foun 54, maibé la sufisiente ba estudante sira atu utiliza iha prosesu ensinu aprendizajen ne’e, mak sei iha alternativa rua maka UNTL tenke hatama filafali orsamentu ba fasilidade sala aula iha tinan 2023, seluk maka ministériu hahú prepara ona sidade Universitáriu Aileu atu koloka estudante UNTL balun iha ne’ebá.

“Ita haree UNTL ninia espasu atu koloka estudante barak difisil ona. Liu-liu atu halo tan dezenvolvimentu edifísiu foun iha ne’ebá difisil ona, maibé ita bele garante mós ba edifísiu foun iha Hera,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here