Médiku hala'o hela imunizasaun ba labarik sira. Iha Sentru Saúde Formoza Dili, kuarta (09/02). Imajen Tatoli/Francisco Sony.

DILI, 10 juñu 2022 (TATOLI)–Diretór Nasionál Estatístika Ministériu Finansa, Silvino dos Santos, informa labarik timor-oan 51% mak durante ne’e la simu vasina bázika.  

Dadus ne’e relata hosi Instituto para a Defesa Direito Crianças (INDDICA) hamutuk ho Diresaun Nasionál Ministéiru Finansa (MF) ne’ebé mak apoiu hosi UNICEF baze aba rezultadu hala’o análiza ba situasaun labarik iha Timor-Leste.

“Labarik timor-oan 51% la simu vasina bázika, enatun halo sira kona moras sira hanesan tuberkuloze, difteria, kokeluxe, tetanus, hepatitis B, pneumonia, meningitis, polio no sarampo,” Diretór Nasionál INDDICA, Silvino dos Santos, hateten iha nia diskusaun, iha salaun City8, Has Laran, Dili, sesta ne’e.

Ho dadus ne’ebé mak fó sai hosi Diresaun Estatístika, Diretór Saúde na Família, Victor Soares, hatán, tanba ho pandemia COVID-19, defisil ba ema atu hakbesik ba fasilidade saúde atu asesu ba vasina bázika sira.

“Ha’u hanoin iha tinan 2019 no metade 2021, ita ho situasaun pandemia COVID-19 entaun difisil tebes ba labarik ho ema boot, menus atu hetan vasina maibé la signiifka atividade sira iha fasilidade saúde ba atendimentu vasina primáriu, sekundáriu no terseiru paradu totál, ne’e lae,” nia dehan.

Tuir nia, dadus ne’ebé mak sira iha katak vasina rutina mak Bacillius Calmette Guerin (BCG) tanba depois partu fó ona asisténsia vasina nian, karik iha fasilidade saúde fó kedas no sira ne’ebé mak partu iha uma, halo post-natal primeiru ka segundu, hodi fó vasina ba labarik sira.

Nia hateten BCG ne’e halo prevensaun ba TB nian, iha 88% signifika maioria labarik 7,958 barak liu no falta pursentu rua (2%) mak MS la konsege fó vasina BCG.

“Tuir mai iha vasina kompletu ne’e nia durasaun temou mak tinan rua, no hosi tinan rua ne’e mós ita halo vasinasaun ba labarik ho 76%. Signifika ita halo duni fó vasina ba labarik ka fó asisténsia ba labarik sira iha tinan 2021 nian,” nia dehan.

Diretór ne’e hateten, iha 2022, Departamentu Informsaun no Estatístika, MS nian hatudu katak MS foin tama trimestre datoluk maibé trimestre daruak ne’ebé eziste ho nia estatutu vasina tuir alvu ne’ebé mak iha.

“Entaun ita konsege mós ultrapasa 83.2% ba BCG, signifika katak labarik ne’ebé moris iha tinan 2022 ho 2021 ita fó vasina ba sira,” nia informa.

Responsável ne’e hateten, dadus ne’e bazea ba rezultadu ne’ebé mak iha Timor-Leste tanba dadus maihosi Gabinete Polítika Planu Koopersaun, Departamentu Informasaun no Estatístika ne’e kompilla hosi fasilidade saúde hotu-hotu hosi nivel kiik mak postu saúde nian mai to’o Ospitál Nasionál Guido Valadares (HNGV), inklui ospitál munisípiu referral tantu vizita saúde ba família ho mós mobile klinika atividade vasina nian.

Labarik 70% seidauk asesu sertidaun RDTL

Entretantu, nia informa, labarik iha Timor-Leste 70% seidauk hetan sertidaun moris ka RDTL.

“Ami iha estatístika, lei fó dalan ona ba ami, tuir dekretu-lei númeru 7/2003, iha nasaun Timor-Leste, instituisaun ne’ebé provide dadus nasionál mak estatístika nian. Entaun publikasaun ne’ebé mak estatístika fó sai ne’e dadus nasionál nian, ita tenke ser uza hodi buka dalan hodi solusiona ba asuntu labarik,” nia dehan.

Atu ko’alia kona-ba labarik tenke planu halo dezenvolviementu ba labarik sira iha Timor-Leste, nune’e hosi dadus ne’ebé sira aprezenta ne’e bele hetan solusaun ba relatóriu ida-ne’e.

Diretór Saúde na Família, Victor Soares, hateten Ministériu Saúde (MS) só prepara de’it formatu no Minsitériu Justisa (MJ) liuhosi Dirasaun Notariadu mak prosesu ba sertidaun.

“Ha’u hanoin diploma konjunta ne’ebé mak asina hosi Ministériu Saúde ho Ministéiru Justisa liuhosi Dirasaun Notariadu nian hateten klaru ona, katak fasilidade saúde prepara hela formuláriu ba inan isin-rua ne’ebé mak partu iha ospitál ka iha uma atu parteira sira pienxe no haruka ba Notariadu hodi prosesa,” Victor hateten.

Kona-ba prosesu ba tratamentu ba sertiduan RDTL, nia dehan, durante ne’e la’o hela maibé la’o ladún másimu no la signifika paradu.

“Maibé ha’u nafatin halo enkontru ida ho MJ atu bele ajuda maluk sira presiza duni sertidaun moris nian maibé la signifika paradu, ha’u hatene katak la’o hela,” nia dehan.

Tanba, tuir nia, durante ne’e MS iha evidénsia ba halo prosesu tratamentu ba RDTL mak utilizasaun Livriñu Inan Saúde ho Oan (LISIO).

Maibé tuir Diretora MOFFE, Yasinta Lujina katak, labarik 70% seidauk hetan sertidaun moris tanba ema barak mak seidauk hatene informasaun kona-ba MS prepara ona formatu ka LISIO iha fasilidade saúde nian.

“Entaun ita presiza halo sensibilizasaun ba iha área rurál, nune’e ema hatene no bele hakbesik an ba fasilidade saúde hodi bele hetan sertidaun RDTL ne’e,” nia dehan.

Aleinde ne’e, kestaun seluk mak estrada no hela dook hosi fasilidade saúde, entaun pesoál saúde mak ba besik komunidade iha área rurál atu foti dokumentu tanba liuhosi meiu ida-ne’e mak bele tulun sira.

Jornalista  : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here