Prezidente Komisaun G, António Verdial. Imajen Tatoli/Tomé Amado

DILI, 10 juñu 2022 (TATOLI)—Prezidente Komisaun G Parlamentu Nasionál (PN) ne’ebé trata asuntu Edukasaun, Kultura, Juventude, Desportu no Sidadania, António Verdial, husu ba Governu liuhosi Ministru Ensinu Superior Siénsia no Kultura (MESSK) atu fó fila independénsia Universidade Nasionál Timor-Lorosa’e (UNTL) atu fó responsabilidade tomak jere jestaun administrativa.

Prezidente Komisaun G, António Verdial, konsidera problema ne’ebé akontese iha UNTL tanba universidade públika ne’e laiha ona independénsia atu jere ninia jestaun administrativa kona-ba rekrutamentu ba estudante foun, maibé Governu maka rekruta liuhosi Komisaun Asesu Engresu Ensinu Superiór (KAEES) ne’ebé tutela ba MESSK.

“Tenke fó fila independénsia administrativa ba universidade atu sira bele iha poder tomak hodi halo rekrutamentu ba kandidatu universitáriu sira,” Deputadu KHUNTO ne’e informa iha resintu PN, sesta ne’e.

Notísia relevante: Reitór UNTL agradese ba asaun pasífika estudante hodi hadi’a jestaun

Biban ne’e, Deputadu Bankada Governu ne’e husu MESSK atu tetu ho didi’ak, atu fó fila direitu UNTL ne’ebé kabe ba kompeténsia eskluziva Governu nian.

Iha fatin ketak, Ministru Ensinu Superior Siénsia no Kultura, Longuinhos dos Santos, hateten, prosesu rekrutamentu ba kandidatu foun atu asesu ba UNTL nian iha hela faze diskusaun.

“La sala iha tinan 2020, ministériu fó ona kompeténsia tomak ba Reitór ho ninia ekipa atu halo preparasaun hodi tama ba prosesu alterasaun-lei,” nia akresenta.

Tuir Ministru, lei ne’ebé presiza altera maka estatutu UNTL, rejime jurídiku Ensinu Superiór, inklui estatutu Institutu Politékniku Betano (IPB) mós presiza altera, tanba lei atuál fó kompeténsia ba Governu atu deside númeru estudante tama ba UNTL.

“Tanba ne’e presiza altera tiha lei ne’e, nune’e iha futuru UNTL de’it maka iha kompeténsia ho independénsia atu halo rekrutamentu ba kandidatu foun sira ne’ebé atu asesu ba universidade públika ne’e,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here