Administradór Postu Administrativu Baucau Vila, Isencinio António da Silva. Imajen Tatoli/Natalino Belo.

BAUCAU, 09 juñu 2022 (TATOLI) – Autoridade postu administrativu Baucau Vila, planeia rekolla dadus ba fatin-ne’ebé identifikadu nu’udar poténsia turizmu nune’e futuru bele dezenvolve hodi fó retornu ba estadu.

Administradór Postu Administrativu Baucau Vila, Isencinio António da Silva, esplika, fatin ne’ebé iha poténsia turizmu tuir kada suku iha postu administrativu Baucau vila nune’e bele rekolla no rejista hodi halo planu nune’e futuru bele dezenvolve.

“Bainhira dadus iha tiha ona, sei enkamiña ba Ministériu Turizmu, Komérsiu no Indústria (MTKI) hanesan parte hosi planu nune’e bele dezenvolve,” nia informa ba Agência Tatoli iha Vila Antiga, sesta ne’e.

Autoridade Postu Administrativu Baucau Vila identifika ona fatin turizmu hanesan turizmu naturál iha área tasi, turizmu kulturál, relijiozu no istóriku.

Nune’e mós fatuk lenuk iha suku Buruma, Uatobo suku Bahú, bee-tudak iha suku Uailili, fatin ne’ebé militár Indonézia kaptura Komandante saudozu David Alex ‘Daitula’ iha Caibada, abrigu subar fatin atúal Primeiru Ministru, Taur Matan Ruak iha Uailili no turizmu relijiozu hanesan gruta iha suku Tirilili no Bahú.

Administradór Postu Administrativu Baucau Vila rekoñese fatin hirak-ne’e bainhira dezenvolve sei fó retornu ekonomia ba komunidade tanba sei atrai turista lokál no internasionál sira.

“Iha suku hotu iha maibé ita seidauk rekolla hotu dadus, tanba ne’e iha tempu badak ita sei esforsu-aan atu rekolla no rejista hotu fatin sira-ne’e,” Isencinio akresenta.

Baucau Vila iha suku hamutuk 11 komposta hosi Bahú, Bucoli, Buruma, Caibada, Gariuai, Samalari, Seiçal, Tirililo, Triloka no Uailili ho totál populasaun hamutuk na’in-57.009.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here