Sekretáriu Rejionál ba Asuntu Saúde, Manuel da Costa, sai oradór ba komemorasaun 12 Novembru. Imajen Tatoli/Abílio Elo Nini.

OÉ-CUSSE, 09 maiu 2022 (TATOLI) – Sekretáriu Rejionál ba Asuntu Saúde, Manuel da Costa, fó-sai katak, rekursu umanu ne’ebé presta serbisu iha fasilidade saúde, seidauk prienxe rekezitu hodi mellora atendimentu ba komunidade iha Rejiaun Administrativa Espesiál Oé-Cusse Ambeno (RAEOA).

Manuel da Costa, informa fasilidade saúde ne’ebé eziste iha RAEOA hamutuk sentru saúde lima no postu saúde 19, ospitál referál ida, ho profisionál hotu-hotu iha rejiaun ne’e, koloka ba fasilidade saúde iha territóriu Oé-Cusse hamutuk 300-resin.

Notísia relevante : PA RAEOA fiskaliza projetu haat kona-ba fasilidade saúde públika

“Ita seidauk prienxe estandarizasaun, ita sei menus ba rekursu umanu ne’ebé mak halo prestasaun serbisu iha sentru saúde, postu saúde inklui ospitál referál, tanba ospitál referál na’in-120 de’it, profisionál koloka iha sentru saúde, postu saúde na’in-204, ne’e variasaun hosi médiku, parteira, infermeiru, saúde públika, farmásia, analista no nutrisionista. Númeru ne’e to’o agora aumenta, maibé la sufisiente atu mellora ba atendimentu públiku,” Manuel da Costa, hatete iha Oé-Cusse, kinta ne’e.

RAEOA iha sentru saúde lima

RAEOA iha sentru saúde lima hanesan, sentru saúde Pássabe iha sub-rejiaun Pásabe, sentru saúde Oésilo iha sub-rejiaun Oésilo, sentru saúde Nítibe iha sub-rejiaun Nítibe, no iha sub-rejiaun Pante Makasar iha sentru saúde Baqui no sentru saúde Kiumaonteko.

Sentru saúde sira presiza presiza profisionál na’in-19

Nia fundamenta, ambisaun Governu nian katak sentru saúde ida tenke iha profisionál na’in-19, komposta hosi médiku jerál tenke na’in-tolu, enfermeira na’in-tolu, parteira haat, profisionál saúde aliadu tolu, tékniku laboratóriu ida, tékniku farmásia ida.

Nune’e mós nustrisionista ida, saúde públika ida, la inklui administrasaun, maibé to’o agora Oé-Cusse seidauk prienxe tanba sentru saúde sei koloka ema ida de’it.

Postu saúde presiza na’in-lima

Hosi parte postu saúde atu prienxe rekezitu, tenke iha profisionál na’in-lima, komposta hosi médiku jerál ida no enfermeira ida, parteira ida, profisionál saúde aliadu ida no saúde públika ida.

HRO presiza profisionál saúde na’in-271

Iha ospitál referál tenke iha profisionál 271, ne’e sentru entaun espesialista médiku parteira nutrisionista saúde públiku persiza númeru barak.

Maske menus rekursu umanu, maibé dirijente saúde ne’e, orgullu tanba Hospitál Referal Oé-Cusse, hetan apoia médiku no espesialista mai hosi nasaun kubanu hamutuk na’in-11 ne’ebé konsentra iha Hospital Referál Oé-Cusse

“Ita orgullu tanba hetan apoiu hosi Cuba ba área espesialidade, ho médiku jerál integrál no apoiu serbisu diagnóstiku iha parte laboratóriu, no iha espesialista na’in-haat, ba pediátria konsulta labarik, espesialista silujianu, médisina interna nomos espesialista ba inan-isin rua sira, entaun apoiu hosi kubanu hamutuk na’in-11 iha hospitál referál, serbisu foku-liu ba atensaun sekundária nian,” nia hateten.

Koordenasaun serbisu saúde iha RAEOA ho Ministériu Saúde (MS) kontinua la’o tanba RAEOA hakarak padraun ba fasilidade saúde uniforme.

“Sistema saúde iha nasionál ita hakarak padraun ne’e ida de’it, ne’ebé implementa fasilidade saúde iha munisípiu 13, serbisu tékniku entre RAEOA ho Ministériu Saúde, koordenasaun ne’e la’o nafatin, inklui formasaun téknika no formasaun ita partisipa mós iha nasionál, no mai fornese direta iha rejiaun, entaun ita hakarak ne’e padraun ne’e ida de’it, tantu ekipamentu médiku no fasilidade sira,” nia katak.

Tenke investe iha fasilidade saúde

Sekretáriu Rejionál ba Asuntu Saúde, Manuel da Costa argumenta, atu mellora atendimentu hosi profisionál saúde ba komunidade, persiza investimentu iha fasilidade, formasaun no kapasitasaun beibeik ba profisionál sira, tanba RAEOA iha ona fasilidade saúde 24, maibé seidauk korresponde ba kobertura ba komunidade sira-ne’ebé hela iha área remota.

“Entaun ba oin ita hakarak kontinua aumenta konstrusaun ba fasilidade postu saúde, tanba ita identifika ona fatin rua iha sub-rejiaun Pante Makasar, iha suku Costa, bairru Kutete no iha sei konstrui iha Leolbatan, tanba komunidade asesu ba fasilidade distánsia dook, no kontinua investe liuhosi atividade formasaun no kapasitasaun ba profisionál sira,” nia afirma.

Nune’e mós sei aumenta fasilidade saúde iha sub-rejiaun Nítibe, suku Lela-Ufe iha aldeia Mahata, inklui ida-tán iha sub-rejiaun Pante Makasar konstrui iha suku Taiboko, aldeia Ulas, entaun persiza hakbesik fasilidade saúde ba komunidade, nune’e fasil hetan asisténsia saúde.

Notísia relevante : RAEOA aloka millaun $1-resin konstrui fasilidade saúde públika

Jornalista   : Abílio Elo Nini

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here