Sekretáriu Rejionál Asuntu Saúde, Manuel da Costa. Imajen Tatoli/Abilio Elo Nini.

OÉ-CUSSE, 09 maiu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál ba Asuntu Saúde, sei fó-sai konkursu públiku iha tinan ne’e, ba profisionál saúde sira atu kompete hodi ba kontinua estudu espesialidade iha nasaun Cuba, Fiji no Indonézia.

“Daudaun ne’e servisu saúde rejionál komunika ona ho Ministériu Saúde no Ministra Saúde mós hetan ona karta hosi Prezidente Autoridade RAEOA, atu ajuda fasilita bolsu estudu ba profisionál saúde sira hosi Oé-Cusse, atu ba kontinua hasa’e tán sira-nia nia koñesimentu ba área espesialidade nian iha nasaun tolu,” Sekretáriu Rejionál ba Asuntu Saúde, Manuel da Costa, hatete iha Oé-Cusse, kinta ne’e.

Nia informa, estudu fatin ne’ebé autoridade propoin maka hanesan, nasaun Cuba, Fiji no Indonéaia, agora prosesu komunikasaun kontinua la’o hela to’o faze akordu ninian, tanba tuir planu sei realiza iha setembru tinan ne’e, nune’e iha 2023 sira dezloka ona.

“Razaun atu kontinua estudu iha área espesialidade sira mak hanesan, atu kontinua prepara ita-nia rekursu rasik iha futuru, nune’e bainhira sira remata bele fila-fali mai Oé-Cusse hodi kontinua dezenvolve setór saúde tantu rejiaun no sentrál,” nia katak.

Daudaun ne’e autoridade RAEOA ho Ministériu Saúde, kontaktu la’o hela, no Ministériu Saúde mós fasilíta ona halo kontaktu ho nasaun tolu ne’e, nune’e iha tinan ne’e bele hahú ona.

Nune’e, ba kandidatu atu asesu iha programa bolsu estudu ne’e, sei liuhosi konkursu públiku, loke ba profisionál saúde sira atu kompete, ne’ebé prienxe kritériu maka sei reprezenta RAEOA ba kontinua estudu fokaliu ba espesialidade sira.

“Prioridade Autoridade maka ne’e, persiza iha espesialidade ba pediátria, oksetabinopoJia, médisina interna, emerjénsia intensiva, ne’e ba iha nasaun Cuba, espesialidade ba oftamolojia matan nian ba iha nasaun Fiji, no programa estudu kona-ba jestaun ospitál, epidemolojia no estatístika no farmásia, ne’e autoridade nia hakarak ba iha Indonézia,” nia informa.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

1 KOMENTÁRIU

HAKEREK NO HATÁN

Please enter your comment!
Please enter your name here