Preidente Parlamentu Nasional, Aniceto Guterres Lopes, Imajen Tatoli/Antonio Goncalves.

DILI, 09 juñu 2022 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, kinta ne’e, hala’o enkontru ho Prezidente Repúblika, José Ramos Horta, hodi hato’o funsionamentu Parlamentu Nasionál (PN) liu-liu dezempeñu servisu.

Notísia Relevante: PPN louva PR Horta husu deskulpa ba deputadu sira iha PN

“Primeiru enkontru hato’o informasaun ba Xefe Estadu hodi bele akompaña kona-ba funsionamentu PN liu-liu dezempeñu iha PN ne’ebé nia knar mak halo lei no halo fiskalizasaun ba asaun Governu,” Prezidente Parlamentu Nasionál ne’e hateten ba jornalista sira hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite, Dili.

Maske nune’e, Aniceto Guterres la esplika detalla dezempeñu servisu PN nian maibé hanesan órgaun lijisladór iha lejislatura ne’e aprova ona lei importante lubuk ida hanesan projeitu no proposta-lei.

Ho informasaun sira PR bele akompaña hodi asegura instituisaun funsionamentu instituisaun demokrátika hanesan PN hodi garante funsionamentu bele funsiona tuir nia dalan.

“Hanesan ita hotu hatene konstituisaun dehan Prezidente Repúblika mós hanesan garante ba instituisaun demokrátika,” nia hateten.

Bibán ne’e, PPN ho PR ko’alia mós asuntu seluk liga ho oinsá iha konsensuál ba desizaun Estadu tomak, oinsá foti medida sira hasoru COVID-19 ne’ebé daudaun ne’e mundu konsidera tama ona ba endemia.

“Iha enkontru ne’e asuntu seluk ko’alia mós liga ba kompeténsia PN nian, presiza konsensu desizaun Estadu tomak nian kona-ba situasaun COVID-19 ne’ebé tama ona ba endemia. Daudaun nr’r Estadu la dekreta Estadu Emerjénsia (EE) maibé iha lei Sistema Saúde fó dalan ba Governu atu aplika medida espesiál hanesan obriga ema atu kumpre regra protokolu saúde hanesan uza máskra no medida sira seluk,” Prezidente PN ne’e dehan

Nune’e, Governu bele aplika medida sira mezmu laiha EE hodi proteje sidadaun hosi virus COVID-19.

“Medida espesiál ne’e aprova ho lei maibé iha prazu loron 120 de’it no loron 120 agora ne’e nian sei hotu iha 19 jullu tinan ne’e. Entaun antes to’o ne’eba órgaun Estadu sira ko’alia extende loron ne’e ka oinsá hodi fó fatin ba Governu hola medida bainhira mosu derrepente virus COVID-19 foun mai tan,” nia dehan.

Aniceto Guterres hateten, extensaun ne’e bele ho lei iha Parlamentu Nasionál (PN) nia kompeténsia foti desizaun ba asuntu Estadu.

Jornalista : Nelson de Sousa

Editór        : Cancio Ximenes

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here