Ekipa AIFAESA halo inspesaun iha armazen empreza Perissos, iha Fatuhada, kinta (06/02/2020). Imajen TATOLI/Antónia Gusmão

DILI, 08 juñu 2022 (TATOLI)-Parlamentu Nasionál liuhosi Komisaun D ne’ebé trata asuntu ekonomia no dezenvolvimentu husu ba Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA I.P) atu halo fiskalizasaun ba folin sasán iha merkadu iha territóriu Timor-Leste.

Xefe Bankada KHUNTO, Deputada Olinda Guterres. Imajen TATOLI/Egas Cristovão

Vise-Prezidente Komisaun D, Olinda Guterrres, dehan fiskalizasaun ne’e importante hodi identifika presu sasán tanba dala barak mosu manipulasaun ba folin sasán no mós produtu balun ninia data produsaun liu  ona prazu.

Notísia Relevante :Folin sasán sa’e , PM konsidera lisaun ba TL valoriza produtu lokál

“Ha’u husu ba AIFAESA atu urjente tuun lalais bá iha terrenu atu bele fiskaliza sasán sira-nia folin, tanba ida ne’e sira-nia konta atu latarias ninia prazu liu, supremi nia prazu liu no folin foos sa’e sira mak tenke hatene no sira halo laporan mai,” nia hateten ba Tatoli, iha Parlamentu Nasionál, kuarta ne’e.

Kona-ba presu sasán ne’ebé daudaun ne’e sei kontinua sa’e, Vise-Prezidente Komisaun D ne’e husu ba Governu Konstitusionál daualu atu halo intervensaun ba folin sasán iha merkadu nune’e povu bele iha kbiit atu sosa.

“Governu presiza tau atensaun lalais, tanba povu koitadu sira faan pisan goreng, se mak atu hola sira-nia pisang goreng se uluk ida centavu lima, agora sa’e ba 25 centavu se mak atu hola, nune’e sira hodi saída atu sustenta sira-nia uma laran, Governu mak tenke haree,” nia preokupa.

Hatan ba pedidu ne’e, Diretór Operasaun Autoridade Inspesaun, Fiskalizasaun Atividade Ekonomia Sanitária no Alimentar, Institutu Públiku (AIFAESA, I.P), Veriato Paulo, hateten iha fulan-janeiru 2022 liubá, AIFAESA forma ona brigada ida hodi halo inspesaun no fiskalizasaun ba presu sasán nesesidade bázika iha merkadu.

“Durante ne’e Brigada Emigrasi halo inspesaun, tanba ita hatene katak ita timor depende tomak ba importasaun ne’e 100%. Entaun, bazeia ba dekretu númeru 29 ko’alia kona-ba presu justu iha ne’e defini katak atinji lukru kada operadór ekonómiku, hanesan sira brosista nia la liuhosi 10% no retalista 15%,” nia hateten.

Durante prosesu fiskalizasaun no inspesaun ne’e la’o, ekipa brigada emigrasi foti faktura husi kompañia importadór sasán husi rai liur hodi fiskaliza luxru ba proudut sira labele liuhosi pursentu 10 to’o 15.

Daudaun ne’e, nia parte submete ona relatóriu inspesaun no fiskalizasaun hirak ne’e ba iha Ministériu Koordenadór Asuntu Ekonomia (MKAE).

“Hanesan ita-nia operadór ekonomiku, sira ne’ebé retalista ba faan to’o munisípiu liga ba kustu operasionáis, konserteza sira-nia sasán folin sa’e oituan, maibé hanesan ha’u dehan ami ekipa tuun bá halo fiskalizasaun sempre haree fatura sira ne’ebé sira hola, katak, retalista ami haree fatura ne’ebé sira hola iha loja distribuitór no loja distribuitór sira, ami haree sira-nia fatura sira ne’ebé hola iha rai liur importa mai ita-nia Nasaun,” nia esplika.

Maske halo fiskalizasaun no inspensaun maka’as iha terrenu maibé iha kompañia balun kontinua manipula presu sasán.

“Tanba, halo inspektulasaun ba presu ne’e kriminaliza ona, entaun ami halo de’it auto notísia hodi submete ba Ministériu Públiku hanesan na’in ba prosesu kriminál. Hanesan, iha balun ami submete ba iha ne’ebá no nia prosesu entrega ona ba Ministériu Públiku hodi hala’o sira-nia knaar tuir kompetensia ne’ebé atribui legálmente,” Diretór ALFAESA ne’e hateten.

Notísia Relevante :Governu hahú diskute polítika ba intervensaun folin sasán

Jornalista : Nelia Fernandes

Editór    : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here