Diretór Administrasaun no Finansa MEJD, Antoninho Pires. Imajen Tatoli/Egas Cristóvão

DILI, 09 juñu 2022 (TATOLI)–Ministériu Edukasaun Juventude no Desportu (MEJD) realiza atividade to’os eskolár ba eskola hamutuk neen iha munisípiu Lautém, Aileu no Liquiçá atu hadi’a nutrisaun estudante sira liuhosi programa merenda eskolár.

“Ita implementa atividade to’os eskolár atu apoiu nutrisaun di’ak ba labarik sira liuhosi programa merenda eskolár atu sira bele han ai-han ka modo fresku sira ne’ebé foti hosi kintál laran,” Diretór Jerál Administrasaun Finansa, Antoninho Pires, informa ba Agência Tatoli iha ninia knaar fatin, MEJD Vila Verde, kinta ne’e.

Notísia relevante: MEJD hasa’e osan merenda eskolár ba kada estudante

Atividade to’os eskolár ne’ebé implementa ba eskola neen nu’udar programa pilotajen ida kuandu ba futuru hetan progresu di’ak bele kontinua implementa tan ba eskola sira seluk iha territóriu nasionál.

Aleinde ne’e, fó mós benefísiu ba estudante tanba bele hanorin oinsá hatene kuda modo tahan ka ai-horis ruma iha kintál laran ka iha área eskola ne’ebé mamuk, hafoin rezultadu hosi ai-horis ne’ebé kuda bele benefisia estudante sira.

“Programa pilotajen atividade kuda ai-han iha área eskola ne’e la signifika atu redús orsamentu ba programa merenda eskolár, maibé nu’udar atividade ekstra kurrikulár ida atu hanorin estudante sira bele kompreende uza área ne’ebé mamuk hodi kuda buat ruma,” nia tenik.

Programa ne’e rasik hahú iha tinan 2019 no daudaun ne’e haluan tan ona ba munisípiu Bobonaro, iha eskola ida iha Leos maka durante ne’e kuda batar hodi apoiu ba estudante sira.

Jornalista : Tomé Amado   

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here