Komunidade aldeia Busadao asesu de’it solar panel tanba seidauuk asesu eletrisidade. Imajen Tatoli/Celestina Teles.

COVALIMA 08 juñu 2022 (TATOLI)-Komunidade husi aldeia tolu iha suku Taroman postu administrativu Fatululik, munisípiu Covalima to’o oras ne’e seidauk asesu eletrisidade.

Xefe Suku Taroman, postu administrativu Fatululik, Leonel Asa,  informa suku Taroman iha aldeia 5 ho totál uma-kain hamutuk 623, maibé aldeia tolu seidauk asesu forñesimentu liña eletrisidade.

Notísia Relevante :Uma-kain 317 iha Hoho-Rai la asesu eletrisidade

Aldeia lima ne’e kompostu husi Taroman, Lia-Nain, Makous , Fatuloro no holbaa. Aldeia Taroman, Lia-Na’in maka asesu ona liña eletrisidade, maibé aldeia Makous, Fatuloro no holbaa seidauk asesu eletrisidade.

“Ha’u nia suku iha aldeia 5, hosi aldeia lima ne’e aldeia rua mak asesu ona eletrisidade no aldeia tolu seidauk asesu eletrisidade nuudar lideransa komunitária reprezenta komunidade husu ba governu atu dada eletrisidade,” nia hateten ba jornalista sira iha salaun administrasaun Fohorem, kuarta ne’e.

Komunidade sira uza de’it solár panél no lampu manuál hodi sunu iha tempu kalan, durante tinan 20-resin ona, tanba ne’e, Governu liuhosi Ministériu Obra Públika, presiza  prevee ona fundu iha orsamentu jerál Estadu hodi instala liña eletrisidade ba komunidade sira iha suku ne’ebá.

Problema laiha eletrisidade difikulta tebes estudante sira atu estuda iha tempu kalan no mós komunidade sira ne’ebé maka persiza eletrisidade hodi loke negósiu.

Aleinde eletrisidade, komunidade iha suku Taroman mós enfrenta problema estrada aat hodi difikulta komunidade sira atu transporta sira-nia produtu lokál bá iha merkadu.

“Ha’u nia observasaun durante ne’e komunidade sira hasoru dezafiu bo’ot hanesan la  asesu estrada ho nune’e difisil ,sira  atu faan sira nia produtu lokál ba  merkadu “nia dehan.

Atu asesu merkadu Fatululik, nia esplika komunidade sira persiza aluga motor ojek ho presu $ 30 hodi tula sira bá no fila, tanba postu ne’e laiha transporte públiku atu tula sira bá merkadu.

Entretantu, munisípiu Covalima ho postu administrativu hitu, kompostu husi Fatululik, Fatumea, Fohorem, Tilomar, Maucatar, Zumalai no suai.

Notísia Relevante :Abitante 1.625 iha Suku Dato Tolu la asesu eletrisidade

Jornalista: Celestina Teles

Editor: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here