Vítima Domingos Ximenes bainhira hala’o tratamentu iha HoREX Baucau hafoin transporta mai HNGV no oras ne’e hakotu ona iis iha HNGV. Imajen espesiál.

BAUCAU, 08 juñu 2022 (TATOLI) – Domingos Ximenes ho idade 61 hakotu iis iha Hospital Nacional Guido Valadares (HNGV), Dili, iha loron 06 fulan-juñu hafoin baku hosi rian rasik ho inisiál PX.

Kazu refere akontese iha loron kuarta kalan, 01 juñu purvolta oras 19:00 iha área Kairala, aldeia Samalaku-liba, suku Buibau, postu administrativu Baucau vila, antes han kalan, vítima buka lampra iha suspeitu nia kuartu ho intensaun atu fó-han asu hakiak.

Suspeitu ne’e deskonfia ho kondisaun moras mentál lori besi-kanu baku vítima nia liman parte karuk no kontinua baku iha ulun no hásan parte karuk tohar, rezulta vítima Domingos Ximenes tenke evakua ba Hopital Rejionál Eduardo Ximenes (HorEX) Baucau.

Anina Ximenes Guterres nu’udar oan hosi matebean Domingos Ximenes, nunka espera kazu refere rezulta nia pai Domingos Ximenes hakotu iis nune’e rekomenda atu instituisaun relevante lori suspeitu ba postu administrativu Laclubar, munisípiu Manatuto (fatin moras mentál) atu hetan tratamentu nune’e futuru labele repete tán ba ema seluk.

“Ha’u la hirus nia tanba ha’u-nia mãe nia maun ne’ebé hahoris ha’u, ha’u hakarak de’it lori ba fatin moras mentál,” nia hateten.

Maske antes ne’e Polísia Nasionál Timor-Leste (PNTL) detein suspeitu iha eskuadra Baucau vila hafoin kazu ne’e akontese, maibé daudaun ne’e suspeitu PX iha Baguia tanba razaun kondisaun moras mental.

Família deside mate-isin Domimgos Ximenes transporta suku Larisula, postu administrativu Baguia, atu haloot tuir lisan hafoin hatoba kalan-rua iha rezidénsia Kairala, Buibau, Baucau vila.

Notísia relevante: Domingos Ximenes hetan baku hosi rian rasik

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here