Komunidade aldeia Manan, kuaze satan anin, udan no loron manas iha uma tali-tahan. Imajen Jogerjo Guterres

BOBONARO, 09 juñu 2022 (TATOLI)-Membru Konsellu Koordenasaun Munisipál (CCM,sigla portugés), liuhosi votasaun sekreta kuarta ne’e, hili ona postu Administrativu Balibo no Maliana sai benefisiariu ba programa Uma Kbiit Laek (UKL+) tinan 2022.

Uma Kbiit Laek iha suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

Enkontru ne’e lidera husi prezidente meza, Ernesto de Oliveira Barreto ho membru asembleia hamutuk ema na’in 26 halo diskusaun no votasaun hodi hili postu administrativu rua ne’e sai benefisiáriu ba programa UKL + tipu A no B durante tinan 2022 nian.

Notísia Relevante :UKL 2021: Falta uma sia mak seidauk konstrui

Iha votasaun membru asembleia sira hili postu administrativu Balibo ho votu hitu hodi sai benefisiáriu ba UKL+ tipu A, enkuantu postu administrativu Atabae, Cailaco, Bobonaro, Lolotoe no Maliana menus husi votu hitu.

Maibé UKL + tipu B nian la liuhosi votasaun tanba tuir matadalan UKL+ tipu B implementa de’it iha postu villa iha munisípiu, nune’e otomatikamente implementa iha postu administrativu Maliana.

Prezidente Autoridade Munisípiu Bobonaro, Ernesto de Oliveira Barreto, husu ba administradór postu rua ne’e atu servisu ho tranparansia no rigór iha prosesu identifikasaun benefisiáriu sira.

“Hau sente kontente ho desijaun ne’ebé ita hili tanba ita indika apar kedas ho sua Exelensia Primeiru Ministru,Taur Matan ruak nia hakarak,  iha fulan kotuk nia ba liu iha Batugade haree uma barak mak sei aat no balun sei hela iha uma-tali ne’ebé importante servisu ho laran para povu bele sente duni dezenvolvimentu,” nia hateten hafoin anúnsia rezultadu votasaun iha salaun administrasaun munisipál.

Iha parte seluk, Sekretaria Ezekutiva Téknika Programa Nasionál Dezenvolvimentu Suku (PNDS) Munisípiu Bobonaro, Claudina Soares Pinto, hateten tempu badak sei halo sosilizasaun ba autoridade munisípiu  to’o suku kona-ba matadalan UKL + nune’e bainhira tama iha implementasaun la mosu ona duvidas iha públiku.

“UKL + ne’e mós para atu bele responde ba situasaun balu akontese iha tinan kotuk ne’ebé mak iha tinan kotuk ita la konsege rezolve, maibé tinan ne’e ita bele rezolve problema sira ne’e,” nia esplika.

PNDS sei uza metodu rua hodi halo verifikasaun, dahuluk maka halo levantamentu direta ba iha komunidade sira atu haree kondisaun uma, depois halo entervista ba iha viziñu no autoridade lokál  ne’ebé besik ho komunidade ne’e tanba atu sai benefisiáriu tenke familia ho rendimentu menus husi $1.25 kada loron.

“Ita opta sistema ida ne’e la’ós ami mak deside, maibé sei fó kompetensia tomak ba autoridade munisípiu no administradór postu mak deside se mak sai benifísiariu ba prosesu ida ne’e, entaun papél hosi sekretariadu no funsionáriu PNDS nia tomak nia funsaun hanesan fasilitadór atu fasilita prosesu tomak para atividade hotu bele la’o ho diak,”Nia hateten.

Administradór Postu Administrativu Balibo, Procopio Caero, apresia ho desizaun CCM nian no promete katak sei implementa programa ne’e ba duni ema kbiit laek sira.

“Ami sei servisu makaas para identifika komunidade kbiit laek sira ne’e ho klaru no justu no merese hetan duni,” Nia promete.

Entertantu tinan 2022,  Ministeriu Administrasaun Estatál (MAE) liu hosi Programa Nasionál Dezenvolvimentu Suku (PNDS) sei konstrui UKL+ uma Unidade 6000 iha Territóriu laran tomak ho nia kategoria rua mak hanesan Kategoria (A) totál uma  1000  ho nia kustu másimu $13,000 inklui mão de obra, mediu distribuisaun uma 71/PA/M kada suku sei hetan uma lima ka neen.

Enkuantu kategoria (B) sei konstrui uma hamutuk unidade 5000 ho nia kustu $ 2,400 inklui mão de obra $100 ho nia mediu distribuisaun 357 uma/PA/M no kada suku hetan uma 27 ba to’o 28.

Notísia Relevante :Governu sei identifika uma-kain 6.000 sai benefisiáriu UKL+

Jornalista: Sérgio da Cruz

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here