BAUCAU, 09 juñu 2022 (TATOLI) – Sub-Komisaun Reguladora Arte Marsiál (Sub-KRAM) Munisípiu Baucau, kinta ne’e, realiza asaun no marsa ba dame entre organizasaun arte-marsiál.
Prezidente Sub-KRAM Munisípiu Baucau, Padre Justiano de Sousa, SDB hateten, objetivu hakarak kria pás no dame nune’e organizasaun arte-marsiál bele kumpri regra no atividade hotu iha domin no dame hodi kontribui ba dezenvolvimentu.
“Estadu ho fuan no laran tomak reativa hikas tanba hanoin nia oan sira atu utiliza poténsia tomak iha área desportu atubele lori timor ba mundu,” Prezidente Sub KRAM munisípiu Baucau hateten iha Vila Antiga, kinta ne’e.
Maske diferensa iha organizasaun arte-marsiál maibé estadu hakarak juventude hotu unidade hodi kria pás no estabilidade nune’e liuhosi atividade marsa ba dame organizasaun hotu bele komunika ba malu.
“Orientasaun no regra sira-ne’ebé fó-sai hosi estadu, ita espera katak ba oin labele mosu tán konflitu,” Justiano akresenta.
Sub KRAM ba oin sei hamutuk ho responsável organizasaun hotu ne’ebé halao atividade desportu iha Baucau atu sosializa regra kona-ba ativadade arte-marsial.
Nune’e mós rejista atividade no membru hahú hosi munisípiu to’o nível aldeia hanesan sidadaun ne’ebé hakarak tuir treinu tenke iha karta autorizasaun inan-aman, autoridade lokál no treinadór sira tenke iha sertifikadu.
Koordenadór Persaudaraan Setia Hati Terate Munisípiu Baucau, Alfredo Freitas, hateten, krime sira-ne’ebé akontese tenke husik iha pasadu, liuhosi asaun dame ne’e membru organizasaun arte-marsiál hotu liuliu PSHT, IKS no KORK tenke kria unidade hodi kontribui ba dezenvolvimentu.
“Ita la’ós autór krime iha Baucau maibé dame na’in, dalabarak ita vítima ba polítiku sira tanba ne’e hahú ba oin tenke hamutuk, importante mak Baucau oan tenke kria pás no unidade,” Alfredo hateten.
Atividade asaun dame refere hala’o iha Igreja Parókia Santo António, no realiza marsa ba dame ho rute Vila Antiga, Sentrál, Nagradjo, Vila Nova no remata iha Vila Antiga ne’ebé partisipa hosi Komandante Polísia Nasionál Timor-Leste munisípiu Baucau, António de Sá, Sekretáriu jerál Veteranu Baucau, Manuel ‘Alari’ da Costa Soares, reprezentante autoridade munisípiu Baucau, Bernardo Ornai.
Organizasaun arte-marsiál hamutuk neen ne’ebé hamahon-aan iha Sub-KRAM Baucau hanesan Persaudaraan Setia Hati Terate (PSHT), Ikatan Kera Sakti (IKS), Kmanek Oan Rai Klaran (KORK), Padjajaran, Persai Diri (PD), Ths-THM no Seruling Dewata.
prontu kontribui ba pás
Organizasaun arte-marsiál tolu komposta hosi Persaudaraan Setia Hati Terate (PSHT), Ikatan Kera Sakti (IKS) no Kmanek Oan Rai Klaran (KORK) prontu kontribui ba pás hafoin realiza asaun dame iha Baucau.
Koordenadór IKS Baucau, Jerónimo Freitas, hateten, Kera Sakti estabelese ona estrutura hanaran ‘brigada choque’ atu serbisu hamutuk ho Polísia Nasionál Timor-Leste hodi kontrola membru ne’ebé durante ne’e deskonfia hamosu konflitu iha Baucau.
“Ita kria relasaun públiku entre organizasaun tolu atu iha relasaun hodi hakbesik ba inan-aman sira, liuliu autoridade seguransa nune’e problema ruma akontese organizasaun tolu bele tuur hamutuk rezolve,” Koordenadór IKS Baucau hateten bainhira partisipa iha serimónia asaun dame iha Vila Antiga, kinta ne’e.
Organizasaun arte-marsiál IKS prontu kolabora ho organizasaun rua seluk hanesan PSHT no KORK atu establese ekipa kolaboradór ho autoridade seguransa nune’e ba oin bele kontrola membru sira atu kria pás no unidade iha komunidade Baucau.
Sekretáriu Jerál KORK Munisípiu Baucau, Nuno dos Santos, prontu kontribui ba pás, sai atleta ne’ebé teinadu tenke halakon uluk egoizmu pesoál, tanba dame la’ós hahú hosi li’ur maibé hahú hosi aan-rasik nune’e nu’udar Baucau oan tenke fó liman ba malu atu kria pás no unidade hodi kontribui ba dezenvolvimentu.
“ita hotu tula-dikur no sé kabas ba malu sai Baucau oan, hatudu ba mundu no nasionál katak ita mesak feton no naan de’it,” Nuno dos Santos argumenta.
Jornalista : Natalino Belo
Editór : Evaristo Saores Martins
