Troféu Mundiál. Imajen/espesial

DILI, 09 juñu 2022 (TATOLI)— Prezidente Federasaun Futeból Timor-Leste (FFTL) Francisco Jerónimo, informa ekipa federasaun hamutuk ho Governu hahú prepara  atu simu vizita troféu kampionatu mundiál ne’ebé sei too Timor – Leste iha  loron 11 juñu ne’e.

“Ita nia preparasaun ba atu simu vizita troféu mundiál ne’e atinje ona 80% tanba trofëu ne’e too Timor-Leste sei tama fatin rua de’it mak  Palasiu Prezidensial no Estádiu Munisipál Dili,” informa Prezidente FFTL ba Jornalista-sira iha edifisiu FFTL, kuarta ne’e.

Prezidente FFTL, Francisco Jerónimo. Imajen TATOLI/Francisco Sony

Troféu kampionatu mundiál ne’e sei too iha Timor -Leste iha tuku 09:00, dader ho aviaun privadu ne’ebé apoiu hosi Cocacola. Hafoin too iha aeroportu Prezidente Nikolau Lobato sei ba vizita Palasiu Prezidensiál ne’ebé sei simu direita hosi Prezidente Repúblika, José Ramos Horta no ba fali Estádiu Dili no sai fali hosi Timor-Leste iha tuku 15:00, lokoraik.

Prezidente FFTL dehan vizita troféu mundiál ne’e hala’o kada tinan haat dala ida bainhira atu realiza jogu iha rejiaun ida no nasaun ne’ebé husu hakarak trofëu ne’e vizita FIFA fó autorizasaun.

“Timor – Leste hetan oportunidade di’ak ida bainhira ami ko’alia ho Prezidente FIFA ho membru sira ne’ebé iha Azia ita mak hetan oportunidade tanba FFTL prontu hamutuk ho Governu organiza simu no garante seguransa ne’ebé metin,” nia afirma.

Rute troféu  ne’e sai hosi Europa sei to’o  iha Timor-Leste no sai ba fali nasaun Illa Salomão no hotu ba liu kedan Qatar hodi hein jogu kopa mundiál ne’ebé realiza iha setembru tinan ne’e.

Orariu Kopa Mundial.Imajen/espesial

Nasaun ne’ebé mak sai kampiaun ba troféu ne’e iha tinan lima ba kotuk mak Fransa. Enkuantu kopa mundiál iha tinan ne’e sei Kompete hosi nasaun 40-resin hosi rejiaun Amérika, Ázia, Afrika no Europa.

Trofëu mundiál ne’e halo hosi osan-mean ho nia todan kilograma 6,142, naruk sentimetru 36,8. Trofëu ne’e hanesan prémiu ne’ebé as liu iha mundu futeból.

Trofëu ne’e halo primeiru iha tinan 1930, iha tempu prezidente FIFA, Jules Rimet hodi halo prémiu ida ba eventu futeból nian. Enkuantu klube ka nasaun ne’ebé manán daluluk iha tinan 1930, hosi Urugay iha kontinente Amérika Latina.  Enkuantu Brazíl mak nasaun ne’ebé sai kampiaun barak liu ba trofëu mundiál ne’e.

Notísia relevante:   Timor-Leste sei simu vizita trofëu Kopa Mundiál 

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here