Prezidente Konsellu Veteranu Covalima, Osorio Soares “Mausoko”, xuta bola dahuluk hanesan asaun abertura ba jogu iha kampu aldeia Cawa Uman. Imajen Tatoli/Celestina Teles.

COVALIMA, 08 juñu 2022 (TATOLI)—Xefe Suku Casabauk, Inacio Amarál Gusmão, ho inisiativa hamutuk ho komunidade organiza no realiza desportu amizade ba joven sira hodi redús krime iha postu Tilomar.

“Ha’u hato’o agradese ba komisaun organizadora ho xefe suku Casabauk ho neon kman hodi organiza atividade desportu atu hadook ita-nia joven sira hodi hadook hosi atividade negativu sira liu-liu redús krime iha Tilomar,” Reprezentante Administradór Munisípiu Covalima, Francisco de Jesus Alves, hato’o liuhosi nia diskursu, bainhira halo abertura jogu amizade, iha kampu aldeia Cawa-uma, Suku Casabauk, postu Tilomar, munisípiu Covalima, kuarta ne’e.

Objetivu hosi jogu amizade ne’e ho intesaun kria amizade entre jogadór ho komunidade hodi redús krime iha Tilomar ne’ebé joven sira ho idade 12 no idade 16.

“Ha’u hakarak hato’o atividade ida-ne’e pozitivu tebes, ohin iha kompetisaun jogu entre U-12 ho U-16. Ha’u hakarak hato’o ba ita-bo’ot sira-ne’ebé mak partisipa iha jogu mesak jerasaun foun no sei lori desportu futeból TL ba iha nasional no ba iha mundu,” nia informa.

Ho nune’e, ho jogu amizade ida-ne’e joven sira tenke hatudu talentu iha klubu hosi nasionál bele lori jogadór atu joga iha nivél nasionál to’o iha nivel internasionál.

Administradór Postu Administrativu Tiloma, Benedito Maia, hateten xefe suku hamutuk ho komunidade hola inisiativa realiza jogu amizade ida-ne’e, autoridade postu kumpre idea hosi joven sira kria atividade desportiva ne’e.

“Atividade jogu ida-ne’e, ami kumpre idea hosi joven sira no ohin ita-boot sira atu mai sai hanesan testamuña ba sira, nune’e joven sira postu Tilomar ne’ebé realiza atividade iha suku Casabauk bele haksolok,” nia dehan.

Autoridade postu administrative ne’e mós husu ba administradór munisípiu Covalima atu apoiu materiál desportu ba joven sira hanesan farda no bola.

Prezidente Konfederasaun Deportu Timor-Leste iha Covalima  (CDTL),   João de Jesus Sita, apresia ba xefe suku ho inisitiva hosi realiza atividade  desportu amizade iha postu administrativu Tilomar.

“Ami apresia realiza eventu ida-ne’e, inisiativa mai hosi xefe suku Casabauk hodi halibur joven sira bele kuñese malu liuhosi desportu amizade ida-ne’e. Ita-bo’ot mai haksolok komunidade hodi jogu,” nia dehan.

Klubu joven sira ho idade 12 ne’e mak hanesan Klubu Saneti, Kejao, Laloran, Sato A, Sato B, Infago no Unjaco.

Aleinde ne’e, klubu joven sira ho idade 16 mak hanesan klubu Halibur, Mota Hasan, Fatuk Hun, Laloran, Foho Terin, Unjaco, Leão Fronteira, Mota Hasan, Saneti no laloran.

Iha eventu jogo amizade ne’e partisipa hosi representa administradór munisípiu Covalima, Prezidente Konselu Veteranu Covalima, Inspetór komandante Kompaña Bravo Tilomar, Diretór aduaneira Covalima no komunidade sira.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here