Escola Santa Madalena Canossa, iha Has-laran. Imajen/Espesiál

DILI, 08 juñu 2022 (TATOLI)—Estadu Unidu Amérika (EUA) liuhosi Ajénsia Estadu Unidu ba Dezenvolvimentu Internsionál (USAID, sigla inglés), kuarta ne’e, hamutuk ho Sekretaria Estadu Ambiente (SEA), apoiu saku biodegradável hamutuk 5.000 ba Eskola Santa Madalena Canossa, hodi reforsa programa ‘Eskola Matak’.

“Ohin USAID fornese saku biodegradável hamutuk 5.000 ba eskola Canossa, ida-ne’e hodi ajuda no fasilita proibisaun plástiku ne’ebé uza dala-ida de’it ba komunidade Eskola Canossiana,” Diretora USAID iha Timor-Leste, Zema, hateten iha resintu Eskola Canossa, Has-laran Comoro.

Inisiativa ne’ebé ajénsia internasionál ne’e halo atu apoia misaun Jerál kombate mudansa klimátika liuhosi medida mitigasaun no adaptasaun, nune’e EUA liuhosi USAID nia projetu turizmu ba ema hotu ajuda Timor-Leste implementa Polítika Nasionál Turizmu Timor-Leste nian.

Iha polítika nasionál iha P lima hanesan prioridade, prosperidade, protesaun, parseria no povu, nune’e parseria ho Eskola Canossiana ne’e foka ba P II-protesaun.

“Hanesan nasaun illa sira, ambiente naturál iha Timor-Leste sofre hosi kuantidade lixu plástiku ne’ebé barak tebes. Esgotu sira entupidu ho plástiku ne’ebé uza dala-ida de’it mak sai kauza prinsipál ida ba inundasaun iha tempu Páskoa,” nia akresenta.

Notísia relevante: Implementasaun polítika zero plástiku eduka komunidade kuidadu uza saku biodegradável

Esforsu ne’e inspira hosi Governu Timor-Leste nia polítika zero plástiku ne’ebé envolve Sekretáriu Estadu Ambiente hodi hasa’e konsiénsia kona-ba importánsia hamenus, uza fali, no resiklajen.

“Atu ajuda rezolve dezafiu lixu plástiku iha Timor-Leste, inisiativa ne’e ho objetivu atu eduka joven sira kona-ba risku plástiku ne’ebé uza dala-ida de’it ba sira-nia moris no futuru,” nia tenik.

Iha fatin hanesan, Sekretáriu Estadu Ambiente, Demétrio Amaral, konsidera inisiativa ne’ebé sira foti hanesa prátika di’ak sira hosi nasaun Asosiasaun Nasaun Sudeste Aziátiku (ASEAN, sigla inglés) kona-ba modelu Eskola Matak ne’ebé susesu hodi ajuda eduka, alunu no inan-aman inklui oinsá atu hamenus, uza fali, no resikla plástiku sira ne’ebé uza dala-ida deit.

“Inisiativa ne’e apoia Governu Timor-Leste implementa ninia polítika zero-plástiku,” nia tenik.

Rezultadu di’ak hosi atividade ne’e mak atu promove kolaborasaun no parseria ho parte interesada ambientál hotu hodi diskute no fahe elementu xave sira ba implementasaun programa Eskola Matak iha Timor-Leste.

“Ha’u espera ho pasu kiik ne’e bele ajuda enkoraja no motiva eskola sira seluk atu tuir imi-nia pasu sira. Ha’u kongratula Eskola Canossa ne’ebé kompromete iha programa Eskola Matak,” nia dehan.

Iha estimasaun katak kada loron eskola sira iha Timor-Leste prodús lixu plástiku liu kilograma 2.000, hatudu katak sei falta koñesimentu hosi estudante sira kona-ba impaktu plástiku ne’ebé bele estraga ambiente no kria risku ba saúde no seguransa umanu inklui hafoer fatin no pontu turizmu ikóniku sira.

Nune’e mós, Diretora Jerál Eskola Santa Mandalena Canossa, Madre Ervinha Martins Brito, hateten, nia parte lori eskola Canossa nia-naran, agradese barak ba SEA no USAID nia apoiu hodi hamenus lixu iha sira-nia eskola.

“Saku biodegradável ne’e utíl tebes hodi uza no ita bele fó fali informasaun ba estudante no komunidade hodi labele uza plástiku bainhira hakarak ba hola sasán iha loja,” nia salienta.

Eskola Santa Madalena Canossa rasik daudaun ne’e iha estudante hamutuk 4.000, hahú hosi Pre-Eskolár, Pre-Primária, Pre-Sukundária, Sekundária to’o Universidade.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here