BOBONARO, 08 juñu 2022 (TATOLI)-Polísia Nasionál Timor-Leste (PNTL) liuhosi Unidade Patrullamentu Fronteira (UPF) kompañia Alfa postu Tunubibi, munisípiu Bobonaro, kuarte ne’e detein no deporta ona sidadaun Indonézia na’in haat ne’ebé hakat fronteira ho ilegál hosi Indonézia mai teritóriu Timor-Leste, hodi vizita família.
Bazeia ba rezultadu identifíkasaun, suspeitu sira ne’e mesak mane ho estatutu klosan mak hanesan (MDC) tinan 19, (ES) 17, (OYTL) 24 no (MB) 16, orijen Atambua, Haliwen Kabupaten Belu, Provinsia Nusa Tengara Timur (NTT) Indonézia.
Notísia Relevante: UPF halo apreensaun ba kilat-manu ilegál hosi Atambua
Tuir kronólojia sidadaun na’in haat ne’e lori Manu-futu hamutuk tolu tama hosi área Turiskain-Asumanu, Indonézia ne’ebé jeografíkante baliza ho fronteira Mozon, aldeia Tunubibi, suku Tapo-Memo, postu administrativu Maliana, munisípiu Bobonaro.
Membru UPF ne’ebé halo vizilánsia iha liña fronteira halo kedas intervensaun iha área postu Wadeta-Nunura, suku Tapo-Memo, postu administrativu Maliana, munisípiu Bobonaro, tersa (7/6) tuku 19.00 oras Timor-nian.
“Agora ami prepara ona dokumentu hodi halo termu entrega ba Imigrasaun Indonézia ne’ebé kolokadu iha fronteira”, Komandante UPF, Superintendente Euclides Belo haktuir ba jornalista via telefonika.
Superintendenti ne’e afirma daudaun ne’e UPF konklui ona prosesu identifíkasaun inklui objetu kontra bandu ne’ebé sira lori hanesan manu-futu tolu.
Nia dehan, membru UPF hosi postu Wadeta mós halo kedas impedimentu bainhira sidadaun Indonézia balun hosi parte Haliwen ho identifikasaun adultu ho labarik, koko hakat ho ilegalmente vizita família iha Timor.
Euclides hatutan alende detein ema, UPF servisu ho Batallaun Ordem Públika no FALINTIL-Forsa Defeza Timor-Leste (F-FDTL) destakamentu postu Tunubibi, halo apreensaun ba sigaru ho marka surya 12 ne’ebé hatama ilegál.
Objetu kontra-bandu sira ne’e servisu sekreta iha área pemencar, suku Lahomea, postu administrativu Maliana, iha tersa (7/6) madrugada, deskonfia hatama hosi Atambua tuir fronteira suku Saburai, postu administrativu Maliana.
“Sigaru surya 12 ne’e ne’ebé ita halo apreensaun hamutuk karton tolu, ninia kaixa karik 259, maibé nain ba objetu hirak ne’e sei deskoñesidu hela. Sasan sira ne’e sei aguarda iha kuartel kompañia Alfa, depois halo komunikasaun hodi buka tuir, keta hetan na’in ruma para bele submete ba prosesu imvestigasaun”, dehan nia.
Relasiona ho kazu ne’e superintendente ne’e dehan, UPF kontinua kompremitidu servisu ho autoridade lokál sira ne’ebé hela besik fronteira atu halo vizilánsia másima iha liña fronteira, nune’e bele kontrola movimentu no atividade tranzasaun illegál, nune’e ema hotu bele respeita soberania Timor-Leste.
UPF mos servisu ho Autoridade seguransa Nasaun viziñu hanesan Tentara Nasionál Indonézia (TNI), Polísia Repúblik Indonézia (POLRI) no autoridade sivíl seluk hodi kria armonizasaun para garante movimentu sidadaun nasaun rua bele livre.
Notísia Relevante: UPF detein feto ida hatama sigarru ilegál hosi Atambua
Jornalista : Sergio da Cruz
Editór : Evaristo Soares Martins
