Perfurasaun sistema bee-moos ne'ebé Autoridade RAEOA konstrui iha aldeia Sanane, suku Costa sub-rejiaun Pante Makasar. Imajen Tatoli/Abílio Elo Nini.

OÉ-CUSSE, 08 maiu 2022 (TATOLI) – Servisu Água no Saneamentu (SAS), Rejiaun Administrativa Espesiál Oé-Cusse Ambeno (RAEOA) instala ona perfurasaun bee-moos iha aldeia Sanane, suku Costa, hodi fasilita komersiante sira-ne’ebé hala’o atividade negósiu iha merkadu Numbei, sub-rejiaun Pante Makasar.

Xefe Departamentu SAS RAEOA, Julmira da Silva, informa, komersiante sira iha merkadu Numbei durante ne’e enfrenta problema bee-moos, tanba sistema bee-moos hosi parte foho Oétulu labele kobre hotu vila laran.

Nune’e iha semana kotuk, parte SAS realiza enkontru fó orientasaun ba tékniku operasaun manutensaun nian, katak fasilita instalasaun ba komersiante sira-ne’ebé maka hela iha merkadu ne’e, atu fasilita instalasaun perfurasaun sistema bee-moos ne’ebé autoridade konstrui ona iha tinan kotuk.

“Konstrusaun foun ne’e dada de’it ba ita-nia komersiante-sira, atu fasilita-sira tanba fatin ne’e sai sentru ba atividade negósiu iha Oé-Cusse, tanba volume debitu iha perfurasaun litru 2/segundu, sufisiente bele fornese ba merkadu,” xefe departementu SAS Oé-Cusse, Julmira da Silva, hatete iha Oé-Cusse, kuarta ne’e.

Nia informa, instalasaun ba merkadu Numbei hahú iha segunda to’o kuarta ne’e, rejista ona benefisiáriu hamutuk uma kain-30, maibé sei kontinuasaun, nune’e nia rezultadu ikus seidauk kompleta, tanba sei identifika mós torneira ho totál benefisiáriu.

Konsellu bairru Numbei, Lorenço Liub, agradese ba instalasaun bee-moos ne’e no promete sei koordena ho benefisiáriu atu kria regulamentu nune’e bele uza fasilidade bee-moos ne’e ho di’ak.

“Durante loron tolu ita haree komunidade sira antusiazmu serbisu hamutuk, tanba merkadu ne’e problema boot primeiru maka bee-moos,” nia katak.

Komersiante Baptista Sene, reforsa, komersiante sira-ne’ebé durante ne’e hala’o atividade negósiu iha merkadu Numbei, mai hosi suku 18, no problema prinsipál sira infrenta maka bee-moos.

“Maibe ami agradese tanba agora autoridade mai dada ona bee ba ami idak-idak nia uma, ida ne’e orgullu boot tanba sei fasilita ami hanesan komersiante, tanba balu fa’an modo lori kedas bee hosi uma, atu soe fo’er de’it mós araska tanba bee laiha, entaun sei kria regra ida atu uza bee ne’e tuir nesesidade, labele naran estraga de’it,” nia akresenta.

Tuir dadus ne’e Agência Tatoli asesu, totál benefisiáriu ne’ebé hala’o atividade negósiu iha merkadu Numbei kuase uma-kain 200.

Entretantu, projetu konstrusaun ba perfurasaun sistema bee-moos ne’e lokaliza iha bairru Numbei, aldeia Sanane, suku Costa, sub-rejiaun Pante Makasar, ne’ebé konstrui iha 2021 iha situasaun pandemia COVID-19.

Projetu ne’e ezekuta hosi empreza Colo Unipesoál Lda, ho valór kontratu $63,072.30, ne’ebé autoridade RAEOA prevee hosi orsamentu fundu Covid-19.

Jornalista     : Abílio Elo Nini
Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here