Loron Mundial Oseanu.Imajen/Espesial

DILI, 08 juñu 2022 (TATOLI)— Prezidente Repúblika, José Ramos Horta, husu kontribuisaun sidadaun Timor-Leste proteje sustentabilidade oseanu liuhosi kuda-ai, evita sunu rai arbiru, hamoos ambiente liuliu labele so’e lixu arbiru atu labele afeta ba ambiente tasi.

Xefe Estadu hato’o asuntu ne’e iha ámbitu semináriu nasionál ba komemorasaun loron  Mundiál Oseanu ho sub tema “Ação Coletiva para o Dezsenvolvimento da Economia Azul para Timor-Leste” ne’ebé organiza hosi Universidade Nasionál Timor-Leste iha Hera.

Prezidente Repúblika, Ramos Horta .Imajen Tatoli/Antonio Daciparu.

“Inisiativa ne’e di’ak hodi bele mobiliza atu sensibiliza ba sosiedade ka komunidade sira kona-ba importansia proteje oseanu atu iha illa ki’ik (Timor-Leste) salva ita nia vida no ba ambiente tasi,” Prezidente Repúblika hateten ba jornalista sira.

Prezidente Repúblika husu ba sidadaun hotu atu proteje ai-horis no preserva tasi inklui biodiversidade tasi nian hodi labele fó impaktu ba iha ekonómia azúl.

“Ita iha obrigasaun atu proteje ambiente tasi se lae tinan 20 mai ne’e bele fó risku ba ita nian ekonómia azúl, tanba ita hatene ita nia tasi ne’e luan tebes kompara rai maran kuandu ita proteje halo dia’ak fó retornu ekonomia ba ita,” Xefe Estadu enkoraja.

Atu redús polusaun ba ambiente tasi, Xefe Estadu sujere Governu tenke kria kompetisaun no atribui prémiu ba komunidade sira ne’ebé kontribui ativamente ba ambiente saudavél.

Iha biban hanesan, Reitór UNTL, João Soares Martins, realsa semináriu ida nuudar meiu ida atu universitáriu hamutuk ho komunidade hodi esforsu proteje oseanu liuhosi ambiente rai-maran no tasi.

“Ita nia oseanu bele sai rekursu importante hodi bele prodús reseita ba ita nia nasaun. Tanba ita  riku ho ikan no turizmu marína úniku,” nia afirma.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here