Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 08 juñu 2022 (TATOLI)—Ministru Adminitrasaun Estatál (MAE), Miguel Pereira de Carvalho hateten, kuarta ne’e, Konsellu Ministru diskute proposta-lei Finansa Munisipál maibé presiza hadi’a pontu balun.

Notísia Relevante: PN aprova projetu Lei Eleitorál Munisipál-Podér Lokál iha finál globál

“Ohin, ami diskute ona iha Konsellu Ministru maibé iha pontu balun ne’ebé MAE ho MF presiza aserta fila-fali depois Konsellu Ministru tuir mai mak halo diskusaun no aprova,” Governante ne’e informa ba Agência Tatoli, hafoin enkontru Extraordináriu ho Xefe Governu, Taur Matan Ruak, iha resintu Palásiu Governu, kuarta ne’e.

Governante ne’e haktuir, iha pontu prinsipál liu-liu kona-ba osan ne’ebé atu aloka ba poder lokál aban bainrua ne’ebé iha ligadu ho Orsamentu Jerál Estadu, prinsipál mak Governu sei diskute fila-fali teknikamente hafoin mak haruka fali mai iha Konsellu Ministru hodi diskute no aprova.

Tuir nia, iha tinan kotuk aprova ona legál poder lokál no lei munisipál, nune’e tinan ne’e MAE sei tau prioridade ba lei Finansa Munisipál.

“Tinan ne’e, ha’u-nia prioridade mak lei Finansa Munisipál tenke aprovadu. Lei tolu ne’e bainhira aprova hotu entaun lei fó dalan ita realiza eleisaun ba poder lokál,” nia garante.

Atu realiza eleisaun poder lokál mak presiza prepara di’ak tanba tinan oin iha eleisaun parlamentar no eleisaun suku maibé iha grande opsaun MAE nian ne’e halo eleisaun munisipál halo iha 2024.

“Grande opsaun Ministériu Administrasaun Estatál nian mak eleisaun munisipál sei halo iha 2024,” nia esplika.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here