Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 08 juñu 2022 (TATOLI)—Sekretáriu Jerál Partidu Demokrátiku (PD), Antonio da Conceição ‘Kalohan’, hateten tuir kalendáriu tentativa posibilidade PD sei realiza kongresu nasionál iha fulan-fevereiru 2023.

“Agora estrutura partidu sei hala’o reuniaun hodi ko’alia asuntu rua. Ida, atu komemora aniversáriu partidu nian iha fulan maiu no sei ko’alia mós kongresu nasionál partidu nian ne’ebé tuir kalendáriu, posibilidade kongresu ne’e sei hala’o iha fevereiru tinan oin,” Sekretáriu Jerál Partidu ne’e hateten ba Agéncia Tatoli iha Parlamentu Nasionál, kuarta ne’e.

Nia esplika, kongresu ne’e normalmente halo ho intensaun atu troka lideransa.

“Ami presiza diskute buat ne’e ho didi’ak ho haree situasaun ida atúal no kongresu hosi partidu ne’e hala’o ho objetivu troka  lideransa ka halo reajustamentu  ba estrutura ne’ebé mak ezistente, tanba estrutura atuál iha balun la ativu ba ona fatin seluk, nune’e presiza reajusta fali,” nia dehan.

Aleinde ne’e, kongresu ne’e hodi kumpre ba lei partidu polítiku molok ba iha eleisaun parlamentár iha tinan 2023.

“Kongresu ne’e hala’o kumpre mós lei partidu polítiku molok ba iha eleisaun Parlamentár 2023. Ne’ebé, sai lideransa ida agora tenke responsabiliza ba rezultadu eleisaun di’ak depois implika ona atu halo mudansa demokrátika iha partidu nia laran,” nia hateten.

Nune’e, PD mós hala’o reajustamentu estrutura no ida-ne’ebé seidauk kompleta iha munisípiu no daudaun servisu sira seluk iha baze kontinua la’o hela.

Tuir Lei númeru 2/2016, 3 Fevereiru (Lei partidu polítiku), artigu 19 (Kongresu no Komferénsia Nasionál partidu sira) iha númeru 1 ne’e hateten, partidu polítiku sira bele kria órgaun ne’ebé julga nesesáriu ba prosekusaun objetivu, pelumenus, órgaun sentrál reprezentativu ida, ho funsaun deliberativa.

Númeru 2 hosi artigu ne’e haktuir, Kongresu ka Konferénsia Nasionál partidu nian ne’e aas liu órgaun deliberativu nivél nasionál, pelumenus dois terços (2/3) hosi delegadu sira-ne’ebé direitamente eleitu hosi respetivu sírkulu partidariu, asegura ho partisipasaun no reprezentatividade hosi baze.

Nune’e mós iha númeru 3 ne’e hateten, Kongresu ka Konferénsia Nasionál iha kompeténsia eskluziva ne’ebé prosede ba aprovasaun estatutu no programa polítiku.

Iha artigu 19 (Kongresu no Konferénsia Nasionál partidu sira) iha númeru 4 ne’e haktuir, Kongresu ka Konferénsia partidu nian tenke halo másimu tinan haat (4) dala-ida.

Kalohan hateten, PD preparadu hasoru eleisaun parlamentár mai maibé vitória povu mak fó ba  partidu  tanba ne’e iha estratéjia politika ne’ebé di’ak atu hasoru eleisaun ida ne’e mezmu ho situasaun sira ne’ebé laos fasil.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here