Primeiru Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (08/06). Imajen Tatoli/Francisco Sony

DILI, 08 juñu 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu dekretu-lei kona-ba informasaun kadastrál prediál ne’ebé aprezenta hosi Ministru Justisa, Tiago Amaral Sarmento.

Ministru Prezidénsia Konsellu Ministru, Fidelis Manuel Leite Mangalhães, hateten, objetivu hosi dekretu-lei kadastrál prediál mak atu aprova rejime jerál ezekusaun, konservasaun, atualizasaun no asesu ba informasaun kadastrál.

Notísia relevante: Governu Prepara Ona Ezbosu Lei Kadastru no Rejistu Prediál

“Objetivu hosi diploma ne’e atu fó impulsu relevante ba prosesu levantamentu kadastrál bens imóvel nian, hodi nune’e tantu Estadu ka sidadaun sira bele uzufrui iha dimensaun sira hotu ne’ebé permite hosi lei, sira-nia patrimóniu imobiliáriu no halo regularizasaun hosi sira-nia direitu hamutuk ho instituisaun públika ne’ebé kria,” Ministru relata iha Palásiu Governu, hafoin ramata Konsellu Ministru.

Lejizlasaun kódigu rejistu prediál ho kódigu kadastru sei sai nu’udar mekanizmu atu emite sertifikadu na’in ba rai ba sidadaun sira.

Daudaun ne’e iha dadus kadastrál hosi rezultadu Servisu Nasionál Kadastru (SNC, sigla portugés) ne’ebé halo ona rejistu númeru parsela rai hamutuk 318.000  maibé iha parsela rai 42,000 mak sei iha disputa nia-laran.

ita tun ba iha terrenu hodi halo konfirma fila-fali keta iha mudansa laiha buat ida bele emite ka fó daudaun sertifikadu na’in ba rai no sira ne’ebé sei iha disputa komisaun terras ne’ebé  ita sei harii buka bele rezolve

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here