Prezidente FFTL, Francisco Jerónimo. Imajen TATOLI/Francisco Sony

DILI, 08 juñu 2022 (TATOLI) – Prezidente Federasaun Futeból Timor – Leste (FFTL) Francisco Jerónimo, informa Federation International Football Assosiation (FIFA) iha komprimisiu ne’ebé sériu hakarak apoia dezenvolvementu futeból iha Timor-Leste liu-liu iha área infrastrutura.

“Ohin ami ezekutivu hotu hala’o reuniaun ho delegasaun FIFA hodi koalia kona-ba ita nia dezenvolvimentu futeból,  ne’ebé sira (FIFA) sériu tebes hakarak apoia ita hadi’a futeból liuliu ajuda konstrui estádiu,” Prezidente FFTL, hateten  ba Jornalista-sira iha edifisiu FFTL, kuarta ne’e.

Objetivu FIFA hakarak harii kampu futeból ne’ebé kualidade iha Timor-Leste atu jogu internasionál sira hala’o Timor-Leste bele sai ona uma-na’in.

“Sira hakarak ema timoroan sira hare rasik sira nia jogadór sira joga iha sira nia nasaun rasik ho ema estranjeiru sira,” nia dehan.

Delegasaun FIFA hasoru malu ho ezekutivu FFTL ne’e atu fó informasaun kona-ba prosesu rai ne’ebé Governu Timor-Leste sei oferese ba federasaun.

“Ita nia problema mak ne’e, kona-ba rai nian, ami hetan ona dokumentu ida hosi Ministériu Justisa, maibé FIFA dehan ne’e seidauk bele garante bainhira laiha dokumentu ofisiál hosi Governu entrega ba FFTL,” nia afirma.

FIFA mós kompromete bainhirs dokumentu rai nian iha ona  mak ekipa sei tun atu halo verifikasaun ba rai hodi bele konstrui estádiu ida ho padraun internasionál.

Delegasaun ne’ebé hala’o reuniaun ho ezekutivu FFTL nian mak hanesan, Lavin Vingnesh hanesan FIFA Development no Mehmet Dirlik hanesan manajementu finansas FIFA nian.

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here