Eis Diretór Servisu Edukasaun Dili, Duarte Braganza. Imajen Tatoli/Francisco Sony

DILI, 08 juñu 2022 (TATOLI)—Eis Diretór Servisu Edukasaun Dili, Duarte Braganza, asina ona estudante finalista sekundáriu munisípiu Dili hamutuk 14.439 nia diploma no daudaun distribui ona.

Totál estudante finalista iha Dili inklui Ataúro hamutuk 16.467, daudaun falta de’it estudante 2.028 mak nia diploma seidauk asina.

“Iha eskola tolu mak ha’u seidauk asina diploma hanesan Ensinu Sekundáriu Jerál (ESJ) nú.99 Ataúru, ESJ Finantil no ESJ 04 Setembru UNAMET Balide, tanba eskola sira ne’e la submete sira-nia diploma dala-ida de’it, maibé oituan-oituan, entaun ha’u deside husik lai to’o sira hatama hotu maka ha’u asina dala-ida,” Duarte Braganza informa ba Agência Tatoli iha ninia knaar fatin, Comoro, kuarta ne’e.

Notísia relevante: Ministru Armindo konsidera despaixu sufisiente ba dirijente sesante asina diploma estudante

Estudante sira ne’ebé hetan ona diploma mai hosi eskola hamutuk 24 iha munisípiu Dili no balun hosi Ataúru (antigu postu Dili).

“Eskola sira ne’ebé ninia diploma hetan ona asinatura, kompostu hosi departamentu CT 8.232 no CSH 6.204, enkuantu estudante hamutuk 2.028 ne’ebé ninia diploma seidauk hetan asinatura kompostu hosi CT 975 no CSH 1.053,” nia akresenta.

Nune’e, parte diresaun ne’ebé toma konta ba asuntu ne’e hamutuk ho ministériu halo ona konkordánsia katak problema kona-ba diploma estudante sira tenke rezolve lalais, atu nune’e labele prejudika estudante sira.

“Loloos buat hanesan ne’e labele akontese maibé tanba de’it inkapasidade hosi diresaun ne’ebé toma konta ba asuntu ne’e maka prejudika buat hotu. Maibé ho hanoin ba destinu estudante labele sai fali vítima ba desizaun sira, ha’u deside asume responsabilidade hodi asina diploma estudante sira hodi prepara futuru labarik sira di’ak liután. Ha’u asina 95% ona, ne’ebé eskola sira ne’ebé mak seidauk hetan asinatura ha’u husu nafatin atu lalais hatama diploma kompletu atu ha’u asina dala-ida de’it. Atu estudante sira bele utiliza ba sira-nia nesesidade iha futuru,” nia tenik.

Jornalista : Tomé Amado  

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here