Aimoruk sira iha armazen Servisu Autonomu Medikamentu no Ekipamentu Saúde (SAMES) iha Kampu Alor Dili. Imajen Tatoli/Francisco Sony

DILI, 08 juñu 2022 (TATOLI)—Diretora Servisu Saúde Munisipál, Manufahi Florencia Cortereal Tilman, informa estoke aimoruk esensiál iha armazein sentru saúde munisípiu Manufahi hahú menus , nune’e husu ba Servisu Autonómu Medikamentu no Ekipamantu Saúde (SAMES) halo distribuisaun hodi atende ba pasiente sira.

“Ami iha saúde munisípal Manufahi nia estoke aimoruk iha armazein iha item hamutuk 15 mak estoke menus hanesan ba aimoruk ba inan isin-rua, ba moras tensaun, estómagu no aimoruk esensiál sira seluk,” Diretora ne’e hateten ba Agência TATOLI iha Hotél Timór, kuarta ne’e.

Diretota ne’e rekoñese estoke menus la’ós iha munisípiu Manufahi de’it, maibé estoke menus mós iha armazein SAMES. 

“Aimoruk menus iha nivél nasionál, nune’e ami tau osan hamutuk ho Administradór Munisípiu hamutuk $250 hodi kompras aimoruk hodi asegura ba pasiente sira. Tanba ne’e ha’u husu ona ba Diretór Ezekutivu SAMES katak aimoruk foin lalais   iha loron 06 fulan juñu hahú tama ona,maibé seidauk halo distribuisaun,” nia afirma.

Aimoruk esensiál hanesan Paracetamol mós laiha, hodi difikulta pesoál saúde sira, bainhira vasina komunidade la konsege fó aimoruk refere. 

“Ami halo pedidu rutina ba SAMES, maibé depende distribuisaun. Ami mós hakbesik an ba administradór aloka osan balun ami ba kompra fali aimoruk iha klínika privadu sira ho fo fali ba pasiente sira,” tenik.

Hatan ba preokupasaun ne’e, Diretór Ezekutivu Servisu Autónomu Medikamentu no Ekipamantu Saúde (SAMES) Santana Martins, rekoñese estoke aimoruk esensiál iha armazein SAMES mós menus.

“Maibé, iha loron 6 juñu ne’e, ita nia estoke aimoruk esensiál hahú tama ona no daudaun halo verfikasaun ba pedidu hosi munisipiu sira atu halo distribuisaun iha tempu besik,” Santana Martins kompromete.

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here