Diretor National Promosaun Dezevolvimentu Media Lokal, Jose da Costa. Imajen Tatoli/Francisco Sony.

DILI, 08 junu 2022 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS) no Sekretária Estadu Komunikasaun Sosiál (SEKOMS), tuir planu iha tinan ne’e atu harii mídia munisípiu iha territóriu Timor-Leste maibé agora sei iha hela faze sensibilizasaun no mobilizasaun ba autoridade lokál iha munisípiu.

Notísia RelevanteMAPKOMS-SEKOMS sei estabelese mídia munisípiu iha territóriu nasionál

“Programa mídia munisípiu ne’e foin iha hela aproximasaun no sensibliolizasaun ba autoridade lokál sira. Ita-nia planu iha tinan ne’e, ita hakarak estabelese pilótu haat (4) iha munisípiu Lautém, Bobonaro, Aileu no Manufahi. Alende ne’e, tinan kotuk, ita halo ona sensibilizasaun no semináriu munisipál iha Aileu no Manufahi ba autoridade lokál hanesan xefe suku no liña ministerial ne’ebé eziste iha munisípiu rua ne’e, kona-ba oinsá atu implementa mídia munisipál,” Diretór Nasionál Promosaun Dezenvolvimentu Média Lokál (DNPDML), José da Costa, hateten ba Agência Tatoli, iha nia knar fatin, Palásiu Governu, Dili, kuarta ne’e.

Hafoin halo semináriu nasionál no aproximasaun, DNPDML mós halo hela aproximasaun ho Ministériu Obra Públika (MOP) tanba programa ne’e ministeriál, konjunta ho ministériu administrasaun Estatal (MAE), MOP no MAPKOMS.

“Ita aproxima ho MOP, tanba sira-nia knar bainhira ita hetan ona espasu ruma iha munisípiu Aileu no Manufahi, ita husu sira halo dezeña no planra kadernu enkargu (BoQ=Bill of Quantity) atu halo infraestrutura iha ne’ebá. Maibé, orientasaun MAPKOMS iha fulan hira liubá, katak ida-ne’e planu ba futuru bele halo ne’e. Maibé, agora daudaun ita planu hela atu buka espasu ruma iha munisípiu sira, atu ita kria devizasaun ida iha munisípiu Aileu, Bobonaro, Manufahi no Lautém, atu kria kondisaun tanba iha Manufahi agora daudaun ita-nia funsionáriu ida iha ne’ebá, nia mak responsavel ba mídia,” nia dehan.

Tuir nia, DNPDML buka espasu atu próvizoria funsionáriu DNPDML funsiona iha fatin ne’e atu oinsá nia bele organiza mídia hotu, tantu mídia komunidade no sentru informasaun sira-ne’ebé estabelese iha ne’ebá, nia akumula bainhira atividade munisípiu no Governante sira hosi Nasionál ba, sira organiza atu divulgasaun informasaun ba kanal oioin iha ne’ebá.

“Ita-nia konseitu la’o nune’e. Maibé, atu hateten ita la’ós harii mídia foun iha ne’ebá, hanesan rádiu no televizasaun, maibé ita sai sentru ida ba fatin ne’ebé estabelese atu ita-nia ema iha munisípiu sira organiza. Nune’e, bainhira membru Governu sira vizita no atividade administrasaun sira iha ne’ebá, mídia sira la halo kobertura, tanba ita organiza ona mídia sira iha ne’ebá,” Diretór ne’e esplika.

Maske nune’e, nia afirma, DNPDML mosu ho ida ne’e atu munisípiu sira organiza nia ema, nune’e mídia officer sira ba, sira bele halo atividade kobertura.

“Tanba, iha faze dahuluk, ita funsioná mídia officer iha ne’ebá atu sira funsiona sira-nia portál iha administrasaun, nune’e informasaun sira-ne’ebé iha, sira bele partila iha portál no komunika ho rádiu komunidade no mídia privadu sira atu divulga informasaun iha sira-nia kanal iha ne’ebá. Tanba, durante ne’e ita-nia informasaun sira konsentra de’it iha nasionál, ho ida ne’e Autoridade Lokál sira preokupa. Tanba ne’e ita halo sensibilizasaun ba sira, atu sira intende didi’ak ba programa ne’e,” nia dehan.

Hosi preokupasaun ne’e, mak mosu mídia munisipál atu iha pesoál ou divizasaun ruma organiza kolega mídia sira hotu iha ne’ebá, atu atividade iha munisípiu, sira bele halo kobertura no kanaliza mai Nasionál.

Entretantu, programa ne’e dahuluk hala’o iha munisípiu haat (4) hanesan Aileu, Bobonaro, Manufahi no Lautém, nune’e bainhira iha progresu ba impelemtasaun hafoin implementa fali ba iha munisípiu seluk.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here