Prezidente CAAKUB, António Barreto da Conceição. Imajen Tatoli/Sérgio da Cruz.

BOBONARO, 08 juñu 2022 (TATOLI) – Asosiasaun Sentru Atendimentu Agrikultura Kuda Ulun Bobonaro (CAACUB, sigla portugés), planeia sosa hare-kulit tonelada 150-resin hosi membru agrikultór sira-ne’ebé pertense postu administrativu Maliana iha tinan ne’e.

Prezidente CAACUB, António Barreto da Conceição, esplika, agrikultór sira mai hosi suku lima hanesan; Ritabou, Raifun, Holsa, Odomau no Lahomea ho totál grupu 28 ne’ebé durante ne’e halai natar utiliza rekursu bee hosi irrigasaun Maliana I.

“Agora ami-nia planu fulan-jullu agora hahú sosa hotu agrikultór 302 ne’ebé hamahan-aan iha asosiasaun ida-ne’e, ita-nia tarjetu sei sosa tonelada 150-resin, maibé depende tanba agrikultór balu tinan ne’e ninia produsaun menus, entaun nia labele fa’an, maibé ami sei sosa hotu kedas hosi membru sira-ne’ebé hakarak fa’an,” nia informa ba Agência Tatoli, iha Soso, Maliana, kuarta ne’e.

Iha fulan-maiu ne’e CAACUB rekolla ona hare-kulit tonelada 24 hosi grupu sira-ne’ebé iha fulan-dezembru tinan 2021 liubá, no adubu hosi asosiasaun ne’e utiliza halai natar iha époka dahuluk nia sei falta tonelada 23 tanba hare-kulit ne’ebé agrikultór sira sei oferese hamutuk tonelada 57.

Hare-kulit ne’ebé kada tinan CAACUB sosa hosi agrikultór sira mak hanesan; sihara, IR 64 no nakroma, bazea ba tabela presu normál ne’ebé asosiasaun ne’e define sei sosa ho folin kada kilograma sentavu $0,40.

“Ita agora iha orsamentu oituan iha banku, hanesan ha’u dehan depois rekolla hare-kulit hosi sira-ne’ebé kredit pupuk, mak ita halo monitorizasaun ba agrikultór sira-ne’ebé mak atu fa’an, ami prontu atu hola hotu, hodi motiva sira badinas hasa’e produsaun hare kada tinan,” nia hateten.

Enkuantu hare-kulit ne’ebé CAACUB sosa hosi agrikultór sira iha tinan kotuk hamutuk tonelada 132 halo ona prosesamentu sai foos hamutuk tonelada 90-resin, falta tonelada 60-resin mak sei rai iha armazein Soso, Maliana tanba seidauk halo prosesamentu.

Hosi hare-kulit tinan kotuk aumenta ho tinan ne’e sei fa’an ba Governu tanba iha loron 23 fulan-maiu asosiasaun asina ona kontratu ho Sentru Lojístika Nasionál (CLN, sigla portugés) hamutuk tonelada 50 atu distribui ba komunidade sira.

“Agora ami dulas ona tonelada neen, aumenta ho hare-kulit ne’ebé sei sosa iha fulan-juñu, ita garante katak sufisiente hela atu distribui ba CNL tuir kapasidadae ne’ebé iha, depois ita mós sei fa’an ba kompana sira-ne’ebé iha interese hakarak sosa foos hosi asosiasaun,” nia katak.

Foos-rai ne’ebé durante ne’e CAACUB sosa sei distribui ba kliente sira mak hanesan; restaurante ida iha suku Holsa no nasionál mak loja agrikultór sira iha sentru supermekadu Timor-Plaza, Siara Gracia supermerkadu, supermekadu Meimar no seluk tán.

Foos-rai ne’ebé asosiasaun ne’e fa’an iha merkadu ho folin hanesan kada kilograma $1.10, foos númeru I totál kilógrama 10 ho folin $11, kilograma 25 ho folin $25,50, foos númeru II 25 kilograma folin $12,50, foos ikis kilograma 25 folin $10.

Nune’e mós hare-uut kilograma 50 ho folin $10, foos-metan kada kilograma $1,50, kilograma 55 ho folin $7,50, foos-mean kada kilograma $1.50 no kilograma 5 ho folin $7,50.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here