Iha loron 20 fulan-abríl 2014, Primeiru Ministru Kay Rala Xanana Gusmão, Eis Primeiru Ministru Mari Alkatiri, Xefe Estadu Maiór F-FDTL, Jenerál Tito da Costa Cristovão ‘Lere Anan Timur’ partisipa serimónia rituál hodi oho fahi ida. Rezultadu hosi oho fahi ne’e hatudu sinál di’ak kona-ba estabelesimentu RAEOA-ZEESM. Imajen Evaristo Soares Martins.

OÉ-CUSSE, 08 maiu 2022 (TATOLI) – Autoridade no entidade sira iha Oé-Cusse, kuarta ne’e hahú diskute selebrasaun aniversáriu kriasaun Rejiaun Administrativa Espesiál Oé-Cusse Ambeno (RAEOA) no Zona Ekonomia Sosiál Merkadu ne’ebé sei selebra iha loron 18 juñu tinan ne’e.

Haktuir ba Konstituisaun Repúblika Demokratika Timor Leste, artigu 5 Desentralisasaun no artigu 71 Organisasaun Administrativa.

Iha loron-segunda, 21 fulan abríl 2014, Primeiru Ministru Kay Rala Xanana Gusmão ho eis Primeiru Ministru, Mari Alkatiri, hamutuk ho lia-na’in suku 18 iha OéCusse, hatuur fatuk dahuluk ba estabelesimentu RAEOA-ZEESM iha monumentu Lifau. Imajen google.

Atu implementa artigu sira Konstituisaun ne’ebé mensiona iha leten Governu no aprova tiha ona lei númeru 3/2014, loron 18 fulan-juñu, no mos hetan promulgasaun hosi Presidente Republika kona-ba hamosu Rejiaun Administrativa Espesiál ba Oécusse Ambeno no estabelese Zona Espesiál Ekonomia Sosiál Merkadu (ZEESM).

Atu implementa lei refere Governu no Estadu hili ka hatudu no fó pose ba Mari Alkatiri hanesan Prezidente ba Rejiaun Administrativa Espesiál Oe-Cusse Ambeno no Zona Espesial Ekonomia Sosial Merkadu (ZEESM) no mós iha tempu hanesan halo transferénsia podér no devolusaun kompeténsia atu lidera no dezenvolve Rejiaun no Zona refere hosi parte fízika hodi habelar kualidade vida moris no bein-estar komunidade Oe-Cusse Ambeno.

Nune’e dezde kriasaun lei ne’e, Governu Sentrál hahú aloka Orsamentu Jerál Estadu dahuluk ho montante hamutuk millaun $600-resin, no konsege ezekuta ona millaun $400-resin, hodi konstrui grande mega projetu sira, liuliu ba setór infraestrutura sira, hanesan aeroportu internasionál Rota do Sândalo, ponte Noefefan, estrada pakote I no pakote II no nesesidade sira seluk.

Intensaun ne’e Governu Timor-Leste hakarak atu hasai Oé-Cusse hosi kiak no mukit tanba Oé-Cusse hanesan rai enklave molok sai rejiaun espesiál, ne’ebé hahú hanesan distritu ida-ne’ebé ki’ak no izoladu liu, atu asesu ba kapitál nasaun, Dili.

Nune’e, tersa ne’e Sekretáriu Rejionál ba Asuntu Administrasaun no Estatál, Martinho Abani Elu, nu’udar Prezidente Komisaun Organizadóra, informa, selebrasasaun loron moris RAEOA nian, autoridade RAEOA ne’ebé lidera, Arsénio Paixão Bano, sei konvida oradór prinsipál na’in-haat hodi Governu sentrál, no fundadór RAEOA-ZEESM TL, Mari Alkatiri.

“Ohin ita enkontru atu prepara selebra loron RAEOA nian sei monu iha 18 juñu, ne’ebé autoridade nia preparasaun ne’e agora ita hahú halo diskusaun ho entidade sira hotu, atu prepara komisaun no oradór-sira, tanba sei iha semináriu nasionál marka prezensa hosi membru Governu sira, no fundadór RAEOA-ZEESM TL hanesan Prezidente Autoridade dahuluk, Mari Alkatiri,” Prezidente Komisaun Organizadóra, Martinho Abani Elu, ko’alia iha Oé-Cusse.

Nia informa, semináriu nasionál ne’e sei realiza iha loron 18 juñu, ho tema ‘ho espíritu abnegasaun determinasaun ita-nia eroi sira, oras ne’e ita reafirma nia vitória’, no sei marka prezensa oradór na’in-haat iha serimónia nasionál, tanba sei abertura direitamentu hosi Prezidente Autoridade dahuluk, Mari Alkatiri.

Nune’e oradór sira maka hanesan, Ministru Estadu no Prezidénsia Konsellu Ministru, Fidelis leite Magalhães, mak sai oradór dahuluk, Parlamentu Nasionál hosi Komisaun E, oradór ba finánseiru públiku relasaun ho ezekusaun Orsamentu Jerál Estadu ba  RAEOA, nomoos akadémiku sai oradór ba sosiál ekonómia nia impaktu ba povu Oé-Cusse no Timor-Leste.

“Ajenda ne’ebé ita alista, iha 18 juñu iha parte dadeer to’o lorokraik, ita sei abertura expo sesaun atu promove produtu lokál durante kalan ualu (8) hodi anima komunidade atu festeza loron RAEOA-ZEESM TL nian, ” nia akresenta.

Sekretáriu Rejionál ba Asuntu Komérsiu no Indústria, Pedro da Silva Boquifai, ne’ebé responsabél másimu ba atividade expo sesaun ba promosaun produtu lokál nian, informa, 2022 foin mak selebra dahuluk loron kriasaun RAEOA-ZEESM TL.

“Tinan ne’e foin primeira-vés atu selebra, entaun autoridade iha mandatu ne’e, konvida hotu membru autoridade sesante sira hamutuk ho Prezidente Autoridade dahuluk, sira-ne’e mak inísia hamutuk ho líder nasionál sira seluk,” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here