Komandante UPF, Superintendente Polísia Euclides Belo, tula hela diviza Ajente Prinsipál ba membru UPF. Imajen/ UPF

DILI, 07 juñu 2022 (TATOLI)— Polisia Nasionál Timor-Leste (PNTL) liuosi Unidade Patrullamentu Fronteira (UPF), enfenta hela  limitasaun ba rekursu umanu, ekipamentu, rede, estrada no kondisaun hela fatin, nune’e governu hahú  hadia infrasturtura, hadia membru sira nia bens estar, hadia ekipamentu hodi bele asegura seguransa iha liña fronteira.

Governu estabelese Unidade Partulamentu Fronteira (UPF) ho objetivu  fó orientasaun relasiona ho prosidementu prátika ka funsaun espesializada no seguransa fronteira bainhira hala’o sira nia knar no fó komprensaun ida kona-ba knaar no funsaun operasional, administrativa membru hotu-hotu iha PNTL nia Unidade Patrullamentu Fronteira.

Ho baze legál tuir  mandatu ba PNTL nia Unidade Patrullamentu Fronteira (UPF) ne’e foti husi: IV Governu Konstitusional nia Dekretu-Lei nú.9/2009, loron-18, fevereiru kona-bá lei orgánika Polísia Nasíonal Timor-Leste, artigu 33.

UPF ho funsaun mak halo patrullamentu no vijilánsia iha fronteira territoriál sira, no iha koordenasaun no kooperasaun ho parte interesada sira seluk, espesialmente ho FALINTIL-Forsa Defeza Timor-Leste (F-FDTL).  Nune’e mós Kontrola movimentu ema no sasán sira iha fronteira territoriál, ho koordenasaun no kooperasaun ho Servisu Imigrasaun no Autoridade Auduaneiru (AA/Alfándega).

Alende ne’e, atu koopera ho autoridade administrativa relevante sira seluk tuir lejizlasaun fiskál, aduaneira no sanitaria no atu aplika lei sira  relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk.

UPF mós fó seguransa iha aeroportu hodi hala’o patrulla hale’u pista, terminál no aeroportu ho kooperasaun hamutuk ho parte interesada sira seluk no knaar lejítimu sira seluk, tuir nia misaun.

“Ami identifika dadaun ne’e iha  lakunas ka pontu fraku no pontu forte ba seguransa iha fronteira  hanesan ita haree, seguransa fronteira to’o agora menus rekursu umanu no fasilidade atu fó seguransa másimu ba liña fronteira,” Komandante Unidade Patrullamentu Fronteira (UPF), Superintendente Euclides Belo hateten ba jornalista iha Timor-Plaza-Dili, tersa ne’e.

Liuhosi kooperasaun ho parseiru Timor-Leste Police Development Program (TLPDP),  konsege  konstrui  postu polisia iha  fronteira hamutuk 13, kompostu  11  iha Batugade no rua iha Rejiaun Admistrativu Espesiál  Oé-Cusse no Ambeno (RAEOA) no fasilidade kompleta balun ona, maibé rekursu umanu mak menus atu koloka  ba iha postu polísia sira ne’e.

Komandante UPF ne’e dehan, maske iha dezafiu ba rekursu umanu no fasilidade, maibé UPF kontinua serbisu tuir nia moto hodi garante seguransa iha liña fronteira atu sai fatin seguru ba ema hotu.

UPF mós halo kooperasaun di’ak tebes ho Tentara Nasionál Indonézia (TNI) atu hamutuk asegura liña fronteira entre nasaun rua ne’e.

“Prespetiva Seguransa Fronteira-UPF ba Futuru”

Komandu Polísia Nasionál Timor-Leste (PNTL), segunda (06/06) ne’e, realiza semináriu Nasionál ida ho tema “Prespetiva Seguransa Fronteira-UPF Ba Futuru” hodi elabora hamutuk idea atu oinsá maka seguransa iha liña fronteira bele dezenvolve ho diak iha futuru.

Biban ne’e, Komandante Jerál PNTL, Komisáriu Polísia Faustino da Costa, hateten dezenvolvimentu seguransa iha fronteira ne’ebé di’ak liu mak tenke investe iha infrastrutura.

“Atividade ilísitu iha fronteira ne’e kontribui husi buat barak hanesan infrasturtura, asesu merkaduria no situasaun ida seluk maka kuandu ita nia ema hotu-hotu konsiente katak ita nasaun Independente no Soberanu,” nia afirma.

Nune’e, ba futuru, sosiedade ka komunidade presiza komprende katak Timor-Leste hanesan nasaun soberanu ne’ebé tenke kumpre regra no rekezitu hotu-hotu ne’ebé aplika iha liña fronteira.

“Kuandu ema hotu halo tuir, ha’u hanoin ita nia seguransa kapás no sei la hasoru problema,” haktuir autoridade másimu instituisaun PNTL ne’e.

Entretantu, Vise Ministru Interiór (VMI), António Armindo, hateten limitasaun iha liña fronteira ne’e barak tebes hanesan limitasaun ba ekipamentu, kondisaun hela fatin, limitasaun númeru husi membru sira.

Tanba ne’e, VIII Governu hahú  hadia sira nia infrasturtura, hadia sira nia bens estar, hadia ekipamentu no hanoin atu aumenta mós rekursu umanu ka membru liuhosi rekrtutamentu.

“Ita hahú ona iha tinan kotuk maka sira nia bens-estar uluk halo ona hanesan hasa’e sira nia osan ba alimentasaun ba $10, aumenta sira nia saláriu 5% iha tinan ne’e no iha tinan oin sa’e ba 15% no sei iha benefisiu sira seluk, maibé ida tuir fali maka sira nia infrasturtura hanesan ita hotu hatene iha tinan ida ne’e ita hari’i tan ona postu hamutuk 25 ba no ita hanoin koko atu aumenta tan nafatin,”  tenik Vise Ministru Interiór ne’e.

Governante ne’e informa nia-parte ko’alia ona ho Primeiru Ministru (PM) hanesan mós Ministru Interiór (MI) atu  halo reabilitasaun ba postu hirak ne’ebé existe ninia kondisaun atu membru sira labele hela ho kondisaun ida ne’ebe ladun diak, tuir fali kona-bá sira nia ekipamentu no rekrutamentu membru foun.

“Iha fronteira hanesan ita hotu hatene númeru membru ne’ebe maka ki’ik, tanba ne’e hau hamutuk ho Komandu PNTL ami halo ona planu rekrutamentu bazea ba orientasaun verbal husi Ministru Interiór, haruka ona ba PM nia gabinete maibé ami seidauk simu ninia resposta, hafoin simu nia resposta maka ita foin haree,” nia afirma

Ministru hatutan: “naturalmente sira nia ekipamentu, sira nia kuantidade pesoa ou membru  sira iha fronteira ne’e ita presiza aumenta duni”.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here