Estudante Eskola Sekundária Katólika Ave Maria Suai, rona informasaun kona-ba polítika nasionàl direitu no dever ema ho defisiénsia. Imajen Tatoli/Celestina Teles.

COVALIMA, 07 juñu 2022 (TATOLI)—Diretór Sentru Solidariedade Sosial Covalima (SSC), hamutuk ho ekipa disemina informasaun polítika nasionál direitu no dever ema ho defisiénsia (EhD) kona-ba asesibilidade ba ema ho defisiánsia sira iha eskola públika ba estudante sira iha eskola Sekundaria Katólika Ave Maria Suai (ESCAM).

“Ha’u hanoin konstituisaun RDTL garante direitu ema ho defisiénsia iha Timor-Leste. Polítika Ministériu Solidariedade Sosiál no Inkluzaun servisu hamutuk Ministériu relevante atu haree asesibilidade no eskola inkluzivu. Informasaun ne’e importante ba ita-nia estudante no ba profesór atu haree maluk defisiénsia sira bele asesu ba eskola,” Diretór Sentru Solidariedade Sosiál Covalima, Agapito Asis, informa ba jornalista sira iha salaun ESCAM, tersa ne’e.

Sentru solidariedade Sosiál disemina informasaun ne’e foku ba polítika nasionál direitu ba ema ho defisiénsia ba estudante sira tenke fahe informasaun ne’ebé kle’an iha prátika loro-loron iha eskola no iha fatin públika hamosu diskriminasaun ba ema ho defisiénsia.

Disemina informasaun ba estudante ensinu sekundáriu ne’e ekipa sira aprezenta matéria, polítika nasionál no planu asaun nasionál ba ema defisiénsia no asesibilidade ba eskola públika sira.

Tanba durante ne’e Sentru Solidareidade Sosiál servisu hamutuk ho diretór servisu edukasuan Covalima no diretór eskola sira no ekipa nasionál no munisípiu halo monitorizazaun ba polítika nasionál ba ema ho defisiénsia.

“Durante ne’e ita-servisu hamutuk ho diretór eskola sira ho diretór servisu edukasaun Covalima no mós iha ekipa nasionál no munisípiu ita-halo monitorizasaun ba implementasaun politíka ita-nia maluk defisiénsia iha asesibilidade iha públika hanesan asesu ba edukasaun saúde no infraestrutura,” nia informa.

Ho nune’e, Sentru Solidariedade Sosiál Covalima disemina ona informasaun polítika nasionál no direitu no dever ema ho defisiénsia iha eskola sira hanesan Eskola sekundáriu públiku Zumalai, Eskola Sekundáriu Públiku Suai, Eskola Tékniku Vokasionál Cristal no ohin iha eskola Sekundáriu Católika Ave Maria Suai (ESCAM).

Tuir planu, sei disemina tan informasaun ne’e ba estudante sira iha área rurál hanesan iha postu administrativu sira iha munisípiu Covalima.

Vise Diretór Eskola Sekundária Ave Maria Suai, Martinho Claran reforsa, ohin oportunidade ne’ebé di’ak ekipa hosi Ministériu Solidariedade Sosial disemina informasaun kona-ba direitu no dever ema ho difisiénsia ba estudante sira atu bele hatene.

“Ohin, estudante sira sei rona informasaun ita-nia maun-alin sira iha ita-nia leet mak hanaran ema ho defisiénsia no edukasaun rasik mós iha ona programa hanesan edukasaun inkluzivu maibé to’o agora defisil atu implementa,” nia dehan.

Tanba ne’e, nia husu ba estudante sira hafoin rona informasaun tenke implementa iha família no iha sosiedade nia leet no mós fahe tutan infomasaun ne’e ba komunidade iha terrenu.

Atividade disemina informasaun ne’e partisipa hosi estudante hosi Eskola Sekundáriu Katólika Ave Maria Suai ho estudante hamutuk 364 ne’ebé estudante klase I na’in-146, klase II 101 no klase III hamutuk na’in-117.

Bazea ba konstituisaun RDTL artigu 21 ko’alia kona-ba sidadaun ne’ebé iha defisiénsia hanesan sidadaun ne’ebé iha defisiénsia fíziku no mentál iha direitu no mós obrigasaun hanesan sidadaun sira seluk, maibé sira sei la hala’o knar hirak ne’ebé sira labele hala’o tanba de’it sira-nia defisiénsia.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here