Autoridade RAEOA, tersa ne’e inaugura edidísiu Departamentu Rejionál Transporte no Terrestre. Imajen Tatoli/Abílio Elo Nini.

OÉ-CUSSE, 07 maiu 2022 (TATOLI) – Projetu reabilitasaun edifísiu Departamentu Rejionál Transporte Terrestre (DRTT) ne’ebé lokaliza iha aldeia Sanane, suku Costa, sub-rejiaun Pante Makasar, Rejiaun Administrativa Espesiál Oécusse-Ambeno (RAEOA) gasta $77,405.97.

Projetu reabilitasaun ne’e ezekuta hosi empreza Dijujo Unipesoál, Lda, númeru kontratu, 048/2021/PA/RAEOA-ZEESM, ho valór kontratu $77,405.97 ne’ebé aloka hosi Orsamentu Jerál Estadu (OJE) 2021 durasaun servisu durante loron 120.

Reprezentante Prezidente Autoridade RAEOA, António Hermenegildo da Costa, atuál Sekretáriu Rejionál ba Asuntu Terra Propriedade, orgullu tanba serbisu DRTT iha rejiaun ne’e presiza kria fatin própriu hodi asegura dokumentu transporte nian.

“Ohin ita marka tán pasu ida, tanba RAEOA durante ne’e halo esforsu maka’as atu mellora serbisu hotu, projetu barak autoridade halo liu ona, no ohin ita ofisialmente entrega fasilidade ne’e ba Transporte Terrestre atu hala’o nia serbisu ho di’ak hodi asegura dokumentu ne’ebé komunidade sira mai asesu iha edifísiu públiku,” António Hermenegildo da Costa, ko’alia iha serimónia inaugurasaun ne’e.

Nia fundamenta, patrimónia ne’ebé autoridade prepara atubele serbí povo Oé-Cusse, atu halo atendimentu públiku ho di’akliu-tán, nune’e nia enkoraja funsionáriu iha departamentu Transporte Terrestre atu uza fasilidade Estadu ne’e, ho di’ak tanba ohin halo inaugurasaun ona, nune’e uma ne’e bele nafatin furak nafatin iha rejiaun ne’e.

Diretór Rejionál Infraestrutura, Candido dos Reis Amaral, informa, edifísiu ne’e importante ba servisu DRTT nia atendedimentu ba nesesidade públiku, atu trata dokumentu transporte, hanesan karta kondusaun prodús xapa-matríkula no dokumentu seluk.

“Ita hatene serbisu DRTT kontribui reseita ba konfre Estadu kada fulan ho montante boot, tán ne’e persiza hadi’a sira-nia fatin ba atendimentu, tanba bainhira tempu udan, dokumentu balu udan-been kona,” nia akresenta.

Nia fundamenta, antes ne’e funsionáriu-sira uza hela fatin provizória iha Departementu Servisu Água Saneamentu (DSAS), tanba DRTT tutela iha Diresaun Rejionál Infraestrutura, entaun atendimentu públiku labele paradu maka uza hela fatin ne’e.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here