Prezidente Repúblika, José Ramos Horta. Imajen Tatoli/António Daciparu

DILI, 07 juñu 2022 (TATOLI)–Prezidente Repúblika (PR), José Ramos Horta, konfirma sei sai nu’udar konvidadu onradu no oradór prinsipál iha reuniaun anuál entre Governu no Parseiru Dezenvolvimentu (TLDPM, sigla Inglés) ne’ebé sei realiza iha loron 10 juñu 2022, iha auditóriu Kay Rala Xanana Gusmão, Ministériu Finansa, Aitarak-laran.

Desizaun ne’e, Xefe Estadu konfirma iha reuniaun ohin dader ho Ministru Finansa, Rui Gomes no Vise-Ministru Finansa, António Freita inklui reprezentante hosi Gabinete Primeiru-Ministru iha Palásiu Prezidente, Bairru-Pité.

“Reuniaun anuál ho parseiru dezenvolvimentu ne’e sei prezide hosi Ministru Rui Gomes no ko-prezide hosi Ministra Negósiu Estranjeiru no Kooperasaun, Adalgiza Magno, ho tema ‘Hamutuk Ita Servisu hodi Rekupera Ekonomia ba Sosiedade ida ne’ebé Reziliente,” refere nota ne’ebé Agência Tatoli asesu, tersa ne’e.

Notísia relevante: TLDPM, Governu Hakarak Konsentra Ba Investimentu Projetu Foun

Iha forum altu nível ne’e, Prezidente Repúblika, sei fahe nia vizaun prezidensiál kona-ba dezenvolvimentu nasionál Timor-Leste no oinsá VIII Governu Konstitusionál no parseiru dezenvolvimentu bele serbisu hamutuk hodi fó apoiu hodi alkansa objetivu sira.

Atividade ne’e ho objetivu mak atu permite Governu atualiza ba parseiru dezenvolvimentu kona-ba kestaun sira ne’ebé mak bele afeita ba Timor-Leste nia dezenvolvimentu nasionál.

Tópiku prinsipál ne’ebé Governu no parseiru dezenvolvimentu sei diskute iha fórum altu nível ne’e mak Reforma Jestaun Finansa Públika, ne’ebé mak Governu anteriór inisia ona desde tinan 2015, Adaptasaun Klimátika no Avaliasaun Nutrisaun.

Reuniaun TLDPM tinan ne’e sei diferente tamba akontese iha ámbitu komemorasaun aniversáriu tinan-XX restaurasaun independénsia Timor-Leste no toma pose ba Prezidente Repúblika foun ba mandatu 2022 to’o 2027.

Nune’e mós, marka inísiu ba faze preparasaun Orsamentu Jerál Estadu (OJE) 2023 molok Governu hakat ba jornada orsamentál ne’ebé sei realiza iha loron 30 juñu 2022.

Serimónia ne’e sei partisipa hosi Orgaun Soberanu, membru VIII Governu Konstitusionál, korpu diplomátiku, parseiru dezenvolvimentu, organizasaun sosiedade sivíl, reprezentante sira hosi konfisaun relijiozu, akadémiku, setór privadu inklui mídia.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here