Embaixador Repúblika Filipinas, Abdulmaid Kiram Muin. Imajen /Egas Cristovão

DILI, 07 juñu 2022 (TATOLI)—Prezidente Repúblika (PR), José Ramos Horta, tersa ne’e, hala’o audiénsia ho Embaixadór Filipina iha Timor-Leste, Abdul Maid Kiram Muin, hodi diskute kona-ba adezaun Timor-Leste ba ASEAN.

Notísia Relevante: MNEK relata progresu adezaun Timor-Leste ba ASEAN iha KM

“Ohin, ko’alia kona-ba adezaun Timor-Leste ba ASEAN maibé haree kona-ba situasaun Timor-Leste nian no Prezidente Repúblika iha loos interrese atu Timor bele adere lalais ba ASEAN,” Embaixadór, Abdul Maid, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, Dili.

Diplomata ne’e afirma, Filipina sempre apoiu tanba iha relasaun di’ak tebes ho Timor-Leste atu adere ba ASEAN.

Enkuantu, biban ne’e Embaixadór Filipina ne’e despede ho Xefe Estadu tanba misaun sei ramata iha Timor-Leste hanesan Embaixadór iha fulan-junu nia klaran.

“Ohin, hakarak mai hasoru malu ho Prezidente Repúblika tanba ha’u sei husik Timor-Leste, ha’u-nia kargu iha ne’e hanesan Embaixadór to’o iha 22 juñu. Agora, tinan lima ona, nune’e ohin loron ikus hodi despede PR,” nia hateten.

Filipina durante ne’e halo kooperasaun di’ak ho Timor-Leste hanesan fó apoiu vistu ba estudante timor-oan na’in 300-resin ne’ebé hala’o estudu iha Filipina ne’ebé balun ramata estudu fila ona mai no balun kontinua hala’o estudu.

Aleinde ne’e, iha relasaun kooperasaun iha área ekonomia, sosiál, kultura no seluk tan, tan ne’e, parte rua reafirma hodi hametin liután kooperasaun iha futuru.\

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here