Imajen/Media PR.

DILI, 07 juñu 2022 (TATOLI)—Parlamentu Nasionál (PN), tersa ne’e, liuhosi reuniaun plenária aprova rezolusaun Parlamentu Nasionál númeru 13/V(4a)-akordu kona-ba servisu aéreu entre Repúblika Demokrátika Timor-Leste ho Emiradu Árabe Unidu.

Notísia Relevante: Timor-Leste no Emiradu Árabe Unidu sei estabelese akordu servisu aéreu

“Rezultadu votasaun a-favór 49, kontra no abstensaun 0, nune’e aprovadu no ita ratifika ona akordu ne’e,” Prezidente Parlamentu Nasionál, Aniceto Longuinhos Guterres Lopes, fó sai iha sala plenária.

Ministru Interinu Transporte no Telekomunikasaun (MTK) no Atuál Ministru Obra Públika (MOP), Abel Pires, hateten akordu ida-ne’e sai importante tebes ba Timor-Leste asesu iha mundu.

“Ho akordu ne’e agora ita mós asesu ba sira no sira mós asesu mai ita, entaun iha oportunidade ne’e Timor-Leste mak sei manán barakliu espasu benefisu ligasaun diretamente ho Árabe sira iha aviaun ida bolu Emirete ne’e servi nasaun barak. Nune’e se ligasaun direta mai Timor, ita-nia vizitante hosi nasaun sira bele mai liuhosi ne’e tanba odamatan iha ona,” nia dehan. 

Iha oportunidade ida-ne’e mós, nia dehan, empreza nasionál sira-ne’ebé iha interrese bele asesu mós ba merkadu.

“Emiradu Árabe hanesan nasaun ida-ne’ebé importante iha mundu. Tan ne’e akordu ne’e sai mós parte ida setór turizmu xavi, fó importante servisu aéro ninian,” nia hateten. 

Tan ne’e, Governu agora esforsu hadi’a aeroportu internasionál Nicolau Lobato ho apoiu hosi Governu Japaun no hein katak tinan ne’e bele hadi’a ona.

Enkuantu, ho aprovasaun rezolusaun ne’e parte Ministru Transporte nó Telekomunikasaun (MTK) sei ba Qatar atu selebra akordu refere.

Nune’e, Ministru Abel Pires, lori Governu nia naran agadese ba Parlamentu Nasionál bele aprova ona rezolusaun ne’e.

Iha fatin hanesan, Deputadu PLP, Francisco de Vasconcelos, konsidera ho akordu ne’e vantajen boot oinsá iha ligasaun di’ak no besik, tanba nasaun Emiradu Árabe dezenvolvidu tebes iha área hotu-hotu mk aviasaun ninian.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here